25 красавіка, Мінск /Кар. БЕЛТА/. У Нігерыі ў выніку ўзрыву на падпольным нафтаперапрацоўчым заводзе загінулі як мінімум 110 чалавек, паведамляе тэлеканал France 24 са спасылкай на службу экстраннай дапамогі.
"Колькасць загінулых цяпер складае 110 чалавек", - паведаміў Іфеані Ннаджы з Нацыянальнага агенцтва па надзвычайных сітуацыях. Ён дадаў, што многія ахвяры былі спалены да непазнавальнасці. Цяпер паліцыя шукае ўладальніка нелегальнага нафтаперапрацоўчага завода.
Інцыдэнт здарыўся 23 красавіка на граніцы штатаў Іма і Рыверс. Узрыў здарыўся на падпольным заводзе па перапрацоўцы нафты і на базе, дзе прадавалася вырабленае паліва. Улады раней паведамлялі пра 100 загінулых. Адзначаецца, што прычыны ўзрыву і пажару яшчэ не ўстаноўлены. Пошукавыя і выратавальныя работы прадаўжаюцца.
Прэзідэнт Нігерыі Мухамаду Бухары назваў інцыдэнт у штаце Іма "катастрофай і нацыянальным бедствам".
Нігерыя з'яўляецца не толькі буйнейшым вытворцам нафты сярод краін Афрыкі, на яе тэрыторыі знаходзіцца вялікая колькасць нелегальных нафтаперапрацоўчых заводаў. Як піша ТАСС, у сакавіку бягучага года кіраўнік нігерыйскай камісіі па рэгуляванні здабычы нафты Гбенга Камалафе заявіў, што за год у краіне крадуць нафту і нафтапрадукты на суму большую за $3 млрд. Украдзеная сыравіна перапрацоўваецца ў паліва на падпольных саматужных вытворчасцях, размешчаных на поўдні краіны. Затым прадукты перагонкі прадаюцца на чорных рынках як у Нігерыі, так і ў суседніх краінах. Паводле даных службаў бяспекі, у ценявым нафтавым сектары задзейнічаны сотні падпольных сіндыкатаў і груп.-0-
