22 сакавіка, Мінск /Кар. БЕЛТА/. Амерыканская карпарацыя Boeing установіць абсталяванне, якое падае сігнал трывогі ў выпадку сумніўных або няправільных паказанняў датчыкаў у рубцы, на ўсіх самалётах серыі Boeing 737 MAX, адзін з якіх пацярпеў катастрофу ў Эфіопіі. Аб гэтым паведамляе ТАСС са спасылкай на тэлекампанію АВС.
У прыватнасці, прапануецца аснасціць Boeing 737 MAX аўтаматычнай сістэмай апрацоўкі і аналізу паказанняў, якія паступаюць ад двух ключавых датчыкаў у рубцы. Гэтыя датчыкі вымяраюць, наколькі насавая частка самалёта ўзнімаецца ўверх, уніз або дае крэн у адзін з бакоў пад уздзеяннем сустрэчных патокаў паветра.
Паводле інфармацыі тэлекампаніі, устаноўка такога абсталявання на Boeing 737 MAX - справа фактычна вырашаная.
Тыдзень таму па рашэнні Федэральнага авіяцыйнага ўпраўлення ЗША палёты Boeing 737 MAX на тэрыторыі ЗША прыпынены ў сувязі з авіякатастрофай у Эфіопіі, што адбылася 10 сакавіка і ў выніку якой загінулі 157 чалавек. Boeing 737 MAX 8, які выконваў рэйс з Адыс-Абебы ў Найробі, упаў прыкладна за 60 км на паўднёвы захад ад эфіопскай сталіцы (у раёне горада Бішофту). Дакладныя прычыны авіякатастрофы пакуль не ўстаноўлены.
Катастрофа ў Эфіопіі стала другім крушэннем амерыканскага самалёта гэтай мадыфікацыі за апошнія пяць месяцаў. 29 кастрычніка 2018 года Boeing 737 Max 8 інданезійскай авіякампаніі Lion Air, які выконваў унутраны рэйс з Джакарты ў Панкалпінанг, упаў у Яванскае мора праз 13 хвілін пасля вылету. На борце знаходзіліся 189 чалавек - восем членаў экіпажа і 181 пасажыр, усе яны загінулі. Прычыны катастрофы ўсё яшчэ афіцыйна не абнародаваны, але шэраг экспертаў лічаць, што некарэктнае праграмнае забеспячэнне, загружанае ў бартавы камп'ютар Boeing, магчыма, прымусіла лайнер пачаць раптоўнае зніжэнне.-0-
