10 мая, Мінск /Кар. БЕЛТА/. Злучаныя Штаты вычарпалі магчымасці па пастаўках ваеннай дапамогі Украіне. Калі Кангрэс не ўзгодніць выдзяленне дадатковага фінансавання на $33 млрд для Кіева, пастаўкі ўзбраенняў спыняцца ўжо да 20 мая. Аб гэтым заявіў амерыканскі лідар Джо Байдэн, паведамляе ТАСС.
Паводле слоў кіраўніка Белага дома, праз дзесяць дзён будзе дасягнута "крытычная мяжа", пасля якой ЗША спыняць ваенную дапамогу ўкраінскім уладам. У сувязі з гэтым Джо Байдэн звярнуўся да кангрэсменаў з заклікам як мага хутчэй узгадніць выдзяленне фінансавай дапамогі.
Байдэн таксама адзначыў, што разам з фінансавай дапамогай Кіеву планаваў запытаць у Кангрэса дадатковыя сродкі на барацьбу з наступствамі пандэміі COVID-19. Аднак выдзяленне дапамогі адразу па двух напрамках можа запаволіць працэс. Таму Байдэн прыняў рашэнне паставіць у прыярытэт аказанне дапамогі Кіеву, адклаўшы вырашэнне ўнутрыдзяржаўных задач на больш позні тэрмін.-0-
