Сцяг Аўторак, 19 сакавіка 2024
Усе навіны
Усе навіны
У свеце
18 верасня 2019, 16:50

Амаль 450 тыс. т забруджанай нафты застаецца ў польскіх сховішчах

18 верасня, Мінск /Кар. БЕЛТА/. Амаль 450 тыс. т забруджанай нафты, якая паступіла ў Польшчу вясной гэтага года, застаецца ў польскіх сховішчах. Аб гэтым заявіў кіраўнік кампаніі - аператара польскага ўчастка нафтаправода "Дружба" PERN (ПЕРН) Ігар Васілеўскі, паведамляе ТАСС.

Як нагадаў Ігар Васілеўскі, у польскую сістэму перадачы нафты трапіла больш за 1 млн т забруджанай хларыдамі сыравіны. "Сёння нам удалося знізіць гэты ўзровень прыкладна да 450 тыс. т", - сказаў ён на прэс-канферэнцыі.

Адказваючы на пытанне аб тым, колькі часу спатрэбіцца, каб ачысціць інфраструктуру кампаніі ад забруджанай нафты, Ігар Васілеўскі адказаў, што гэта пытанне да нафтаперапрацоўчых заводаў у Польшчы і Германіі, паколькі гэта іх тавар. "Спачатку мы планавалі, што ачыстка зойме ад 6 да 8 месяцаў, але сёння мы думаем, што гэта запатрабуе больш часу", - заявіў ён.

"Сёння я магу сказаць, што ўсе трубаправоды ачышчаны ад хларыдаў, а забруджаная нафта знаходзіцца ў сховішчах", - адзначыў кіраўнік ПЕРН. Ён падкрэсліў, што пакуль складана гаварыць аб тэрмінах іх апусташэння.

Закранаючы магчымыя прэтэнзіі ПЕРН у сувязі з пастаўкамі забруджанай нафты, Ігар Васілеўскі сказаў, што працэс разліку кампенсацый прадаўжаецца.

Як паведамлялася, "Белнафтахім" 19 красавіка заявіў аб рэзкім пагаршэнні якасці расійскай нафты Urals, што паступае па трубаправодзе "Дружба". Колькасць хлорарганічных злучэнняў у саставе нафты перасягала ў дзясяткі разоў гранічныя значэнні па стандарце. У выніку шэраг краін перастаў прымаць і перапрацоўваць расійскую нафту. Абодва беларускія нафтаперапрацоўчыя заводы - Мазырскі НПЗ і ААТ "Нафтан" - вымушаны былі знізіць загрузку магутнасцей і панеслі страты, урон быў нанесены і трубаправоднай сістэме.-0-

Падпісвайцеся на нас у
Twitter
Топ-навіны
Свежыя навіны Беларусі