6 жніўня, Мінск /Кар. БЕЛТА/. Агні Эйфелевай вежы пагаслі ў памяць аб ахвярах выбуху ў сталіцы Лівана Бейруце, паведамляе Radio France internationale.
Ілюмінацыю адной з галоўных выдатных мясцін Парыжа адключылі апоўначы па мясцовым часе. Мэр французскай сталіцы Ан Ідальга паведаміла, што ўлады Парыжа адправяць Лівану экстранную фінансавую дапамогу ў памеры 100 тыс. еўра, а таксама выказала спачуванні жыхарам Лівана ад імя парыжан у сувязі з гібеллю людзей і разбуральнымі наступствамі выбуху ў порце Бейрута.
Кіраўнік сталічнага рэгіёна Іль-дэ-Франс Валеры Пекрэс аб'явіла аб экстраннай дапамозе памерам 300 тыс. еўра ліванскаму Чырвонаму Крыжу для аднаўлення дзвюх станцый пералівання крыві ў Бейруце. Яна таксама паведаміла аб пачатку збору сродкаў на рэканструкцыю дзяржустаноў і жылых дамоў ліванскай сталіцы. Аб зборы сродкаў для дапамогі ліванскім сем'ям заявіў і мэр XV акругі Парыжа Філіп Гужон, былы віцэ-старшыня групы франка-ліванскай дружбы ў Нацыянальным сходзе Францыі.
Два моцныя выбухі прагрымелі 4 жніўня ў раёне порта Бейрута. Адзін з іх быў асабліва магутны і выклікаў разбурэнні ў радыусе некалькіх кіламетраў. Паводле апошніх даных, мінімум 135 чалавек загінулі, тысячы пацярпелі. Мясцовыя ўлады назвалі прычынай надзвычайнага здарэння дэтанацыю 2,7 тыс. т аміячнай салетры, што захоўвалася на складзе ў порце. Салетра была канфіскавана мытнымі службамі ў 2015 годзе і заставалася ў порце. У Бейруце аб'яўлена двухтыднёвае надзвычайнае становішча, кантроль над бяспекай у сталіцы перададзены ваенным.-0-