21 кастрычніка, Мінск /Кар. БЕЛТА/. Аб'ём пластыкавага смецця, які трапляе ў моры і акіяны, можа вырасці амаль утрая да 2040 года. Такі прагноз зрабіла ў апублікаваным дакладзе Праграма ААН па навакольным асяроддзі (ЮНЕП), паведамляе ТАСС.
Як адзначылі ў ЮНЕП, на пластык прыпадае 85 працэнтаў марскога смецця, і да 2040 года аб'ём забруджвання марскіх акваторый павялічыцца амаль у тры разы, дабаўляючы штогод у акіяны ад 23 млн да 37 млн адходаў. "Гэта азначае, што на кожны метр берагавой лініі будзе прыпадаць амаль 50 кг пластыку", - канстатавалі эксперты.
"З-за гэтага ўсе марскія насельнікі - ад планктону і малюскаў да птушак, чарапах і млекакормячых - трапяць пад рызыку атручэння, парушэнняў у паводзінах, голаду і ўдушша", - папярэдзілі яны.
ЮНЕП звярнула ўвагу таксама на значныя эканамічныя страты, да якіх прыводзіць забруджванне мораў і акіянаў пластыкавым смеццем. Глабальны ўрон для турыстычнай галіны, рыбалоўства, аквакультуры, уключаючы затраты на ачыстку акваторыі, склаў у 2018 годзе ад $6 млрд да $19 млрд. Да 2040 года звязаная з такім забруджваннем фінансавая рызыка для бізнесу можа дасягнуць, паводле прагнозаў, $100 млрд штогод.
Аўтары даклада заклікалі дзяржавы неадкладна зменшыць выкарыстанне пластыку і ажыццявіць трансфармацыю ўсяго яго вытворча-збытавога ланцужка. Акрамя таго, на іх думку, неабходны дадатковыя інвестыцыі ў больш актыўныя і эфектыўныя сістэмы маніторынгу ў мэтах вызначэння крыніц, аб'ёмаў і прызначэння пластыку.-0-
