2 верасня, Мінск /Кар. БЕЛТА/. Афганістан знаходзіцца на мяжы гуманітарнай катастрофы. Аб гэтым заявіў каардынатар гуманітарнай дапамогі ў Афганістане па лініі ААН Раміз Алакбараў, паведамляецца на сайце Цэнтра навін ААН.
Як падкрэсліў Раміз Алакбараў, ААН і яе партнёры прадаўжаюць рабіць усё магчымае, каб пазбегнуць гуманітарнай катастрофы, аднак для гэтага арганізацыі патрэбна значная міжнародная падтрымка.
Прадстаўнік ААН паведаміў: у краіне, якая перажыла сур'ёзную засуху, галоўная праблема - няхватка прадуктаў харчавання. Больш за палову афганцаў не ведаюць раніцай, ці ўдасца ім сёння паесці, у краіне не хапае медыкаментаў.
Аэрапорт Кабула закрыты, але ААН і яе партнёрскія арганізацыі знаходзяць іншыя спосабы адправіць дапамогу. У краіну ўжо дастаўлена каля 600 т прадуктаў харчавання. Яны асабліва патрэбны дзецям, палова якіх хутка будзе на мяжы знясілення. Гуманітарныя супрацоўнікі таксама дапамагаюць згубленым, у тым ліку ў аэрапорце, дзецям аб'яднацца са сваімі блізкімі.
Адзначаецца, што, як бы ні працавалі работнікі ААН і іх калегі з іншых арганізацый, іх магчымасці несупастаўныя з маштабамі патрэбнасцей. Яшчэ да захопу ўлады талібамі ў ААН прасілі міжнародную супольнасць прадаставіць на дапамогу Афганістану $1,3 млрд. На сёння атрымана толькі $400 млн. Раміз Алакбараў паведаміў: у ААН пераглядаюць узровень патрэбнасці афганцаў, які, безумоўна, будзе значна вышэйшы.
"Толькі для таго, каб задаволіць першарадныя патрэбы ў прадуктах харчавання і накарміць маючых найбольшую патрэбу, тэрмінова неабходна знайсці $200 млн", - сказаў Раміз Алакбараў. Ён дадаў, што прадуктаў харчавання на складах ААН у Афганістане хопіць толькі да канца месяца.
Як адзначыў прадстаўнік ААН, талібы абяцалі не перашкаджаць арганізацыі дастаўляць дапамогу людзям, аднак канкрэтная сітуацыя на месцах залежыць ад многіх фактараў.-0-
