22 сакавіка, Мінск /Кар. БЕЛТА/. Футбалісты зборнай Беларусі прайгралі галандцам з лікам 0:4 у стартавым матчы адборачнага турніру чэмпіянату Еўропы, паведамляе карэспандэнт БЕЛТА.
Нідэрланды - Беларусь - 4:0 (2:0).
21 сакавіка. Ротэрдам. 50 000 гледачоў.
Суддзя - Д.Масса (Італія).
Нідэрланды: Сілесен; дэ Лігт, ван Дэйк, Бергвейн, Вейналдум, Бабел (Прамес, 59), Дэпай, дэ Рон (Пропер, 46), Блінд, Фрэнкі дэ Ёнг, Дзюмфрыс (Тэце, 68).
Беларусь: Гарбуноў; Драгун (Лапцеў, 86), Мартыновіч, Шытаў, Палякоў, Кавалёў (Савіцкі 79), Сігневіч (Сарока, 63), Пуціла, Сівакоў, Маеўскі, Стасевіч.
Галы: 1:0 - Дэпай (1), 2:0 - Вейналдум (21), 3:0 - Дэпай (55, з пенальці), 4:0 - ван Дэйк (86).
Папярэджанні: дэ Рон; Драгун, Пуціла.
Пачатак сустрэчы з адным з фаварытаў групы С беларусы правалілі - не прайшло і хвіліны, як гаспадары выйшлі наперад. Аддаючы мяч варатару, груба памыліўся Ігар Шытаў, а Мемфіс Дэпай адкрыў лік. У хуткім часе госці правялі некалькі атак, але поспеху яны не прынеслі. Галандцы прадаўжалі кантраляваць ход гульні і на 21-й хвіліне зноў прымусілі памыліцца беларускіх абаронцаў, пасля чаго Джарджыньё Вейналдум другі раз паразіў вароты Андрэя Гарбунова. Да перапынку беларускія футбалісты стварылі толькі два небяспечныя моманты, але ўдары Станіслава Драгуна і Антона Пуцілы мэты не дасягнулі. Праз 10 хвілін пасля старту другога тайма Міхаіл Сівакоў парушыў правілы ў сваёй штрафной плошчы і Мемфіс Дэпай аформіў галявы дубль, дакладна рэалізаваўшы пенальці. Пасля гэтага гола гульня надоўга супакоілася, толькі бліжэй да канцоўкі ўзнікла некалькі небяспечных момантаў. І калі Ігар Стасевіч і Павел Савіцкі сваімі шанцамі не скарысталіся, то капітан "аранжавых" Вірджыл ван Дэйк змог вызначыцца, устанавіўшы канчатковы рэзультат - 4:0.
Свой наступны паядынак кваліфікацыі Еўра-2020 падапечныя Ігара Крывушэнкі правядуць 24 сакавіка ў Белфасце супраць каманды Паўночнай Ірландыі. У першым туры паўночныя ірландцы прымалі на сваім полі футбалістаў Эстоніі і перамаглі з лікам 2:0. Таксама ў нядзелю галандцы згуляюць у Амстэрдаме з камандай Германіі.-0-
