Фота Федэрацыі пляжнага футбола Беларусі
8 лютага, Мінск /Кар. БЕЛТА/. Зборная Беларусі па пляжным футболе правядзе першы кантрольны паядынак перад стартам чэмпіянату свету ў Дубаі, паведамляе карэспандэнт БЕЛТА.
Сёння беларусы сустрэнуцца з гаспадаром планетарнага форуму камандай Аб’яднаных Арабскіх Эміратаў, якая да гэтага адолела ў авертайме мексіканцаў - 3:2. У жніўні мінулага года ў час II Гульняў краін СНД у Мінску падапечныя Нікаласа Альварада ўпэўнена абыгралі зборную ААЭ - 5:2. Цяпер Беларусь займае 19-е месца ў сусветным рэйтынгу, ААЭ знаходзяцца на 8-й пазіцыі.
Як расказалі карэспандэнту БЕЛТА ў беларускай дэлегацыі, чэмпіянат абяцае быць вельмі цікавым і напружаным. Аб гэтым сведчаць вынікі спарынгаў, якія праходзяць у выключна ўпартай барацьбе. Так, сапернікі беларускай дружыны на папярэднім этапе спартсмены Сенегала прайгралі адной з мацнейшых зборных планеты Італіі з мінімальнай розніцай у ліку - 2:3. Акрамя таго, італьянцы ўступілі ў серыі пасляматчавых пенальці калумбійцам. Таму лёгкіх матчаў дакладна не будзе, але наша каманда іншага і не чакала, паколькі гэта галоўны турнір сусветнага пляжнага футбола. Беларусы праводзяць двухразовыя трэніроўкі, прычым нават сёння, у дзень матчу раніцай яны таксама трэніраваліся. На 11 лютага запланаваны яшчэ адзін кантрольны паядынак - са зборнай Амана. Пасля гэтай гульні трэнерскі штаб вызначыць тузін ігракоў, якія трапяць у канчатковую заяўку для выступлення на ЧС.
На першым этапе чэмпіянату свету зборная Беларусі згуляе ў групе С супраць каманд Сенегала (16 лютага), Японіі (18 лютага) і Калумбіі (20 лютага). Склады астатніх квартэтаў: А - Італія, ЗША, Егіпет, ААЭ; В - Іспанія, Аргенціна, Таіці, Іран; D - Партугалія, Бразілія, Мексіка, Аман. Пасля завяршэння групавога этапу ў чвэрцьфінальную стадыю выйдуць па дзве лепшыя каманды. Сустрэчы 1/4 фіналу адбудуцца 22 лютага, паўфіналы пройдуць 24 лютага, вырашальны паядынак за чэмпіёнскі тытул і матч за бронзу адбудуцца 25 лютага.-0-
