22 чэрвеня, Мінск /Кар. БЕЛТА/. Зборная Беларусі па пляжным футболе атрымала другую перамогу ў адборачным турніры чэмпіянату свету ў партугальскім Назарэ, паведамляе карэспандэнт БЕЛТА.
У сваім другім паядынку кваліфікацыйнай групы С падапечныя іспанскага спецыяліста Нікаласа Альварада разграмілі зборную Нарвегіі з лікам 9:2.
Учора беларусы ўпэўнена абыгралі каманду Польшчы з рэзультатам 8:2 і з дзвюма перамогамі забяспечылі сабе выхад у плэй-оф. Заўтра беларуская дружына завершыць першы этап сустрэчай з іспанцамі. Зборная Іспаніі ў першым туры разграміла нарвежцаў з "сухім" лікам 8:0, а сёння згуляе з палякамі.
Склады астатніх груп: А - Партугалія, Украіна, Турцыя, Казахстан; В - Італія, Германія, Данія, Румынія; D - Швейцарыя, Францыя, Эстонія, Азербайджан.
Пасля завяршэння групавога этапу па дзве лепшыя каманды з кожнага квартэта выйдуць у чвэрцьфінал і прадоўжаць барацьбу за пуцёўкі ў фінальную стадыю чэмпіянату свету. Па выніках еўрапейскай кваліфікацыі пропускі ў Маскву атрымаюць чатыры каманды. Фінальная стадыя планетарнага форуму з удзелам 16 лепшых зборных з усіх кантынентаў пройдзе ў расійскай сталіцы з 19 па 29 жніўня.
Беларуская каманда толькі раз прабілася ў фінальную частку сусветнага першынства. У 2019 годзе у парагвайскім Асунсьёне яна не змагла выйсці ў плэй-оф, заняўшы трэцяе месца ў сваёй папярэдняй групе.
На мінулым тыдні зборная Беларусі таксама ў Назарэ прабілася ў суперфінал Еўралігі. У папярэдняй групе С беларусы разграмілі каманду Турцыі з лікам 8:2, але ўступілі зборным Іспаніі (3:6) і Расіі (3:5). Суперфінал Еўралігі пройдзе 9-12 верасня ў партугальскім горадзе Фігейра-да-Фош. Разам з беларусамі там выступяць зборныя Польшчы, Украіны, Швейцарыі, Італіі, Іспаніі, Партугаліі і Расіі.-0-
