8 чэрвеня, Мінск /Кар. БЕЛТА/. Зборная Беларусі па пляжным футболе даведалася пра сапернікаў па Еўралізе і адборачным турніры чэмпіянату свету, паведамляе карэспандэнт БЕЛТА.
На першым этапе Еўралігі ў партугальскім Назары падапечныя Нікаласа Альварада згуляюць у 3-й групе з камандамі Іспаніі (17 чэрвеня), Расіі (18 чэрвеня) і Турцыі (19 чэрвеня). Затым таксама ў Назары з 21 па 27 чэрвеня беларусы паспрабуюць заваяваць пуцёўку ў фінальную стадыю чэмпіянату свету, які пройдзе з 19 па 29 жніўня ў Маскве. У кваліфікацыйнай групе сапернікамі беларускай зборнай будуць каманды Іспаніі, Польшчы і адзін з пераможцаў папярэдняга адборачнага этапу. Сапернікі ў беларускай дружыны вельмі сур'ёзныя. У прыватнасці, расіяне з'яўляюцца двухразовым чэмпіёнам планеты, шматразовым прызёрам Еўралігі, іспанцы тройчы былі сярэбраным прызёрам сусветнага першынства і некалькі разоў выйгравалі медалі Еўралігі.
Сёння ў Мінску зборная Беларусі пачала падрыхтоўку да маючых адбыцца турніраў. У яе складзе 13 футбалістаў: варатары - Канстанцін Магалецкі, Уладзімір Усціновіч (абодва - "ЦАР-Масіта", Кіраўск), Станіслаў Кляшчук ("Дынама", Мінск); палявыя ігракі - Юрый Пятроўскі, Вадзім Бакач, Іван Канстанцінаў, Арцемій Дрозд, Ягор Гардзецкі, Антон Акуліч (усе - "ЦАР-Масіта", Кіраўск), Алег Гапон, Мікіта Чайкоўскі (абодва - "Гроднааблспорт"), Яўген Новікаў ("Брэст"), Аляксандр Кірылаў ("Шчучын").
Вучэбна-трэніровачны збор прадоўжыцца да 15 чэрвеня, пасля чаго каманда адправіцца ў Партугалію.-0-