6 снежня, Мінск /Кар. БЕЛТА/. У Мінску з 1 снежня пачалася падрыхтоўка дзяцей і падлеткаў да першага этапу спаборніцтва па хакеі "Залатая шайба" і спаборніцтва па біятлоне "Снежны снайпер". Аб гэтым сёння на прэс-канферэнцыі расказаў намеснік дырэктара ДУ "Мінскі гарадскі вучэбна-метадычны цэнтр фізічнага выхавання насельніцтва" - начальнік вучэбна-метадычнага аддзела Віктар Чудараў, перадае карэспандэнт БЕЛТА.
"У гэтым зімовым сезоне спартыўныя мерапрыемствы будуць праходзіць у адпаведнасці з каляндарнымі планамі. З 1 снежня ў Мінску пачалася падрыхтоўка дзяцей і падлеткаў да першага этапу спаборніцтва па хакеі "Залатая шайба", спаборніцтва па біятлоне "Снежны снайпер", запланавана і правядзенне гарадскога зімовага спартыўнага свята "Мінская лыжня", - расказаў Віктар Чудараў.
Паводле яго слоў, пры наяўнасці прыроднага снежнага покрыва і ўстойлівых адмоўных тэмператур у Мінску будзе арганізавана 14 лыжных трас, а таксама запланавана заліванне 25 лядовых каткоў і 31 хакейнай каробкі. Пры адсутнасці прыроднага снежнага покрыва будуць задзейнічаны снегагенератары, якія размесцяць на лыжаролернай трасе "Вяснянка", лыжнай трасе ў парку імя 900-годдзя Мінска, лесапаркавай зоне Мядзвежына і ў гарналыжным цэнтры "Сонечная даліна". Акрамя гэтага, у сталіцы абсталявана больш за 35 месцаў для бяспечнага катання на цюбінгах. Іх колькасць будзе павялічвацца.
Віктар Чудараў нагадаў, што займацца зімовымі відамі спорту мінчане таксама могуць у РЦАП па гульнявых відах спорту "Палац спорту", дзяржаўнай культурна-спартыўнай установе "Чыжоўка-Арэна", МГЦАР па лыжных відах спорту і на лыжаролернай трасе на тэрыторыі футбольнага клуба "Мінск".-0-
