Зайцаў і Бірук атрымалі перамогі на Гран-пры Санкт-Пецярбурга па веласпорце на трэку

7 чэрвеня, Мінск /Кар. БЕЛТА/. На велатрэку "Лакасфінкс" у Санкт-Пецярбургу праходзіць заключны этап міжнароднай серыі Гран-пры па веласпорце на трэку, паведамляе карэспандэнт БЕЛТА.

У чацвёрты дзень спаборніцтваў спартсмены вызначалі мацнейшых у індывідуальным спрынце і омніуме. Адзначыцца на подыуме ўдалося тром беларускім спартсменам: Арцём Зайцаў атрымаў перамогу ў мужчынскім спрынце, а ў жаночым омніуме на п'едэстал падняліся адразу дзве беларускі - Караліна Бірук заваявала золата, Аліна Кароткіна выйграла бронзу.

Гэтыя медалі сталі для Зайцава і Бірук другімі на Гран-пры Санкт-Пецярбурга. Раней Арцём у кампаніі з гоншчыкамі з Тульскай вобласці перамог у камандным спрынце, а Караліна фінішавала другой у гонцы праследавання. Мацнейшай у гэтым відзе праграмы напярэдадні была наша Настасся Кіпцікава.

Спаборніцтвы на велатрэку "Лакасфінкс" завершацца ў пятніцу, спартсмены разыграюць медалі ў мэдысане і кейрыне. Акрамя лідараў беларускага і расійскага веласпорту ўдзел у турніры прымаюць прадстаўнікі каманды Казахстана, заезды праводзяцца ў дарослай і юніёрскай узроставых катэгорыях.-0-