3 мая, Мінск /Кар. БЕЛТА/. Пасля заключных матчаў адборачнага турніру вызначыліся ўсе ўдзельнікі фінальнага этапу мужчынскага гандбольнага чэмпіянату Еўропы 2022 года, паведамляе карэспандэнт БЕЛТА.
Гандбалісты зборнай Беларусі, якія датэрмінова забяспечылі выхад у фінал, у апошнім паядынку 6-й кваліфікацыйнай групы перамаглі ў Мінску каманду Латвіі з лікам 30:26. У другім матчы 6-га тура нарвежцы, якія таксама выйшлі ў фінальную стадыю, выйгралі ў італьянцаў - 37:16. Падагульняючае становішча: Нарвегія - 10 ачкоў, Беларусь - 10, Італія - 2, Латвія - 2.
З астатніх груп у фінальную частку ЧЕ-2022 прабіліся каманды Францыі, Даніі, Нідэрландаў, Ісландыі, Чэхіі, Славеніі, Сербіі, Швецыі, Літвы, Аўстрыі, Польшчы, Украіны, Германіі, Партугаліі, Чарнагорыі, Босніі і Герцагавіны, Паўночнай Македоніі і Расіі. Дзеючы чэмпіён Старога Свету зборная Іспаніі і сярэбраны прызёр каманда Харватыі, а таксама гаспадары фінальнага турніру Венгрыя і Славакія былі вызвалены ад кваліфікацыі.
Жараб'ёўка групавога этапу 15-га па ліку мужчынскага чэмпіянату Еўропы адбудзецца ў чацвер, 6 мая. Сам турнір пройдзе з 13 па 30 студзеня 2022 года на арэнах Будапешта, Дэбрэцэна, Сегеда, Браціславы і Кошыцы.-0-
