7 снежня, Мінск /Кар. БЕЛТА/. Пасля заключных паядынкаў у чатырох папярэдніх групах жаночага чэмпіянату свету па гандболе ў Іспаніі вызначыліся 12 удзельнікаў другога этапу, паведамляе карэспандэнт БЕЛТА.
У 3-і секстэт другога групавога раўнда трапілі зборныя Даніі (4 ачкі), Германіі (4), Венгрыі (2), Рэспублікі Карэя (2), Чэхіі (0) і Конга (0). У 4-й групе згуляюць віцэ-чэмпіёнкі планеты гандбалісткі Іспаніі (4), Бразіліі (4), Японіі (2), Аргенціны (2), Аўстрыі (2) і Харватыі (0).
Другі тузін каманд, якія прадоўжаць барацьбу за ўзнагароды сусветнага першынства, вызначыцца сёння пасля сустрэч 3-га тура яшчэ ў чатырох папярэдніх квартэтах. Становішча ў іх цяпер такое: А - Францыя - 4 ачкі, Чарнагорыя, Славенія - па 2, Ангола - 0; В - Расія, Сербія - па 4, Польшча, Камерун - па 0; С - Нарвегія, Румынія - па 4, Іран, Казахстан - па 0; D - Нідэрланды, Швецыя - па 4, Пуэрта-Рыка, Узбекістан - па 0. У другі раўнд выходзяць па тры каманды. У іх захоўваюцца ачкі, набраныя ў гульнях паміж сабой.
Сустрэчы другога групавога этапу пройдуць з 8 па 13 снежня, пасля чаго ў 1/4 фіналу трапяць па дзве лепшыя зборныя з чатырох шасцёрак. Чвэрцьфінальныя баталіі адбудуцца 14 і 15 снежня, паўфіналы намечаны на 17 снежня, фінальны паядынак і матч за бронзавыя ўзнагароды жаночага планетарнага форуму адбудуцца 19 снежня.
У вырашальным матчы папярэдняга сусветнага першынства, праведзеным у 2019 годзе ў Японіі, гандбалісткі Нідэрландаў абыгралі каманду Іспаніі з лікам 30:29. У гульні за бронзу расіянкі былі мацнейшымі за зборную Нарвегіі - 33:28. Беларускія гандбалісткі ўсяго двойчы гулялі ў фінальных стадыях чэмпіянату свету - у 1997 годзе яны фінішавалі на 16-й пазіцыі, а праз два гады занялі 14-е падагульняючае месца сярод 24 удзельнікаў.-0-
