7 чэрвеня, Мінск /Кар. БЕЛТА/. Новымі намеснікамі старшыні Федэрацыі хакея Беларусі сёння на пазачарговай канферэнцыі ў Мінску выбраны Дзмітрый Баскаў, Сяргей Ганчароў і Анатоль Варывончык, перадае карэспандэнт БЕЛТА.
Выбранне намеснікаў старшыні федэрацыі хакея стала асноўным пытаннем парадку дня. Як паведамлялася, 20 мая ў час справаздачна-выбарнай канферэнцыі новым кіраўніком ФХБ стаў Сямён Шапіра. Кіраўнік беларускага хакея папрасіў не спяшацца з назначэннем сваіх намеснікаў.
Рашэнні аб выбранні Дзмітрыя Баскава, Сяргея Ганчарова і Анатоля Варывончыка прыняты сёння на канферэнцыі аднагалосна. Гэтыя спецыялісты маюць высокі аўтарытэт у беларускім хакеі. Анатоль Варывончык на гэты час з'яўляецца старшынёй праўлення ХК "Нёман" (Гродна) - дзеючага чэмпіёна ў экстралізе, з 1997 па 2001 год ён узначальваў нацыянальную зборную Беларусі.
Сяргей Ганчароў добра вядомы па рабоце ў ФХБ раней на пасадзе генеральнага сакратара, а пры кіраванні федэрацыяй Ігарам Рачкоўскім ён таксама займаў пасаду намесніка старшыні. У маі 2016-га Сяргей Ганчароў быў выбраны членам савета Міжнароднай федэрацыі хакея (ІІХФ) і прымаў актыўны ўдзел у падрыхтоўцы і выбарах месца правядзення чэмпіянату свету 2021 года, які пройдзе ў Мінску і Рызе.
Дзмітрый Баскаў на гэты час з'яўляецца дырэктарам адной з паспяховых хакейных школ БФСТ "Дынама", у мінулым галкіпер, які працаваў затым трэнерам у "Брэсце", "Мінскіх зубрах", "Раўбічах" і юнацкай зборнай Беларусі.-0-