27 красавіка, Мінск /Кар. БЕЛТА/. Стаў вядомы склад зборнай Беларусі па боксе на чэмпіянат свету, які пройдзе ў сталіцы Узбекістана Ташкенце з 1 па 14 мая, паведамілі БЕЛТА ў прэс-службе НАК Беларусі.
Удзел у спаборніцтвах прымуць восем прадстаўнікоў Беларусі: Яўген Кармільчык (вагавая катэгорыя да 48 кг), Дзяніс Салоцкіх (да 51 кг), Максім Панькоў (да 57 кг), Артур Туніеў (да 60 кг), Дзмітрый Дзяшкевіч (да 63,5 кг), Кірыл Самадураў (да 67 кг), Аляксандр Радзівонаў (да 71 кг) і Аляксей Алфёраў (да 80 кг). З-за траўмы на чэмпіянаце свету не выступіць Уладзіслаў Смяглікаў, які дайшоў да чвэрцьфіналу на Алімпійскіх гульнях у Токіа. Усяго планетарны форум ва Узбекістане збярэ больш за 640 спартсменаў са 104 краін, баксёры разыграюць медалі ў 13 вагавых катэгорыях.
На апошнім чэмпіянаце свету па боксе, які прайшоў восенню 2021 года ў Сербіі, наша каманда заваявала дзве ўзнагароды: Аляксей Алфёраў выйграў серабро, а Яўген Кармільчык - бронзу. У сакавіку бягучага года ў Індыі адбылося сусветнае першынство па боксе сярод жанчын, дзе адзіны медаль Беларусі прынесла Юлія Апанасовіч, яна стала трэцяй у вазе да 52 кг.-0-
