16 чэрвеня, Мінск /Кар. БЕЛТА/. Аршанскі "Вітэн" атрымаў перамогу над гомельскім ВРЗ з лікам 5:3 у стартавым матчы фінальнай серыі за залатыя медалі 32-га чэмпіянату Беларусі па міні-футболе, паведамляе карэспандэнт БЕЛТА.
Сёння ў Оршы дзеючы чэмпіён краіны ўжо ў самым пачатку гульні двойчы запар паразіў вароты гамяльчан. Госці не збіраліся здавацца без бою і да перапынку выраўнялі становішча - 2:2. У другім тайме гаспадары забілі яшчэ тры мячы, на што ВРЗ змог адказаць толькі адным голам. Другі паядынак серыі да трох вікторый адной з каманд адбудзецца 20 чэрвеня ў Гомелі, трэці пройдзе 24 чэрвеня ў Оршы. У сёлетнім першынстве аршанская каманда атрымала вікторыі ва ўсіх 28 праведзеных сустрэчах. Для "Вітэна" гэта сёмы фінал, у чатырох ён выходзіў пераможцам.
Учора ў першай сустрэчы "бронзавай" серыі спартсмены "Сталіцы" са складанасцю адолелі на паркеце мінскага палаца спорту "Уручча" гомельскі ВРЗ. Па ходу гульні госці тройчы вялі ў ліку, але не змаглі ўтрымаць перавагу і асноўны час гульні завяршыўся ўнічыю - 3:3. У авертайме нікому не ўдалося вызначыцца, а ў пасляматчавых пенальці поспех спадарожнічаў "Сталіцы" - 5:3. Другая сустрэча серыі да дзвюх перамог адбудзецца 19 чэрвеня ў Гомелі. Калі пасля яе пераможца не будзе вызначаны, то вырашальны паядынак за бронзу пройдзе 23 чэрвеня.
У паўфінальнай серыі "Вітэн" тройчы запар абыграў гомельскі БЧ, а спартсмены ВРЗ з цяжкасцю адолелі "Сталіцу" - 3:2.
У фінальнай серыі мінулага чэмпіянату Беларусі спартсмены "Вітэна" выйгралі ў ВРЗ, уладальнікам бронзы стала "Сталіца". Самы тытулаваны клуб - мінскі "Дарожнік", які шэсць разоў станавіўся чэмпіёнам краіны. У "Лідсельмаша" і "Вітэна" па чатыры залатыя ўзнагароды, па тры - у "Мінска", МАПІДа і "Сталіцы".-0-
