8 жніўня, Мінск /Кар. БЕЛТА/. Вікторыя Азаранка паспяхова пераадолела першы круг асноўнага раўнда буйнога турніру ў Манрэалі (прызавы фонд большы за $2,8 млн), перамогшы Крысціну Младзенавіч з Францыі з лікам 6:0, 6:1, паведамляе карэспандэнт БЕЛТА.
Матч прайшоў пры перавазе беларускі. Да сярэдзіны першай партыі Вікторыі Азаранка ўдалося наладзіць сваю сілавую падачу, у той час як Крысціна Младзенавіч шмат памылялася і не змагла выстаяць супраць магутных удараў саперніцы. У другім крузе Вікторыя Азаранка сустрэнецца з Ёханай Конта з Вялікабрытаніі.
Пасля гульні з Крысцінай Младзенавіч беларуска, якая мела праблемы са спіной на мінулым тыдні, з-за чаго знялася ў ходзе турніру ў Сан-Хасэ, адзначыла, што адчувае сябе лепш і сканцэнтравана на матчах. "Цяпер важна звярнуць увагу на свае кандыцыі, удасканальваць дзеянні, і не важна, хто знаходзіцца на другім баку корта", - адзначыла Вікторыя Азаранка.
На прэс-канферэнцыі пасля гульні журналісты пацікавіліся ў Вікторыі Азаранка, ці не складана сумяшчаць мацярынства і выступленне ў прафесійным туры. Тэнісістка падкрэсліла, што гэта няпроста. Кожную свабодную хвіліну яна стараецца правесці з сынам Леа. "Хачу быць прыкладам яму, каб ён бачыў, як важна быць працавітым, дысцыплінаваным, рашучым для дасягнення сваёй мары, застаючыся пры гэтым сціплым", - расказала Вікторыя Азаранка.-0-
