ДЗЯРЖОРГАНЫДЗЯРЖОРГАНЫ
Флаг Субота, 8 мая 2021
Мінск Суцэльная воблачнасць +8°C
Усе навіны
Усе навіны
Спорт
17 сакавіка 2021, 17:11

Віктар Лукашэнка абмеркаваў з кіраўніцтвам спартыўнай галіны Расіі падрыхтоўку да Алімпіяды

Фота АКР
Фота АКР

17 сакавіка, Мінск /Кар. БЕЛТА/. Першая афіцыйная сустрэча Віктара Лукашэнкі на пасадзе прэзідэнта НАК Беларусі з кіраўніком Алімпійскага камітэта Расіі Станіславам Пазняковым і міністрам спорту Расійскай Федэрацыі Алегам Матыцыным адбылася сёння ў Маскве. У час перагавораў быў разгледжаны шырокі спектр пытанняў, звязаных з будучымі Алімпійскімі гульнямі, паведамілі ў прэс-службе НАК Беларусі.

Ключавой тэмай стала падрыхтоўка спартсменаў да XXXII Алімпіяды ў Токіа. На заключным этапе на першы план выходзяць аспекты хранабіялагічнай і кліматагеаграфічнай адаптацыі да ўмоў правядзення Гульняў. Не менш важныя інфраструктурныя, навукова-метадычныя і навукова-тэхнічныя магчымасці правядзення збораў і сумесных трэніровачных мерапрыемстваў. Быў абмеркаваны падыход да вакцынацыі спартсменаў і іншых членаў дэлегацый з улікам рэкамендацый аргкамітэта Токіа-2020 і МАК па ахове і абароне здароўя ўдзельнікаў і гасцей Гульняў.

Станіслаў Пазнякоў і Віктар Лукашэнка ўдзялілі асаблівую ўвагу тэматыцы мерапрыемстваў па абмене вопытам з удзелам прадстаўнікоў НАК Беларусі, АКР і іншых краін, у тым ліку ў рамках праектаў пры падтрымцы алімпійскай салідарнасці МАК. У прыватнасці, размова ішла аб пашырэнні ўдзелу профільных беларускіх спецыялістаў у праграмах Расійскага міжнароднага алімпійскага ўніверсітэта, удзеле маладых беларускіх спартсменаў у Міжнародным форуме юных алімпійцаў, а таксама аб падрыхтоўцы да ўдзелу прадстаўнікоў арганізацый у Форуме кіраўнікоў НАК краін СНД, Балтыі і Грузіі, запланаваным на гэту восень у Ташкенце.

Прэзідэнт АКР Станіслаў Пазнякоў адзначыў, што візіт беларускага боку важны з пункту гледжання далейшых крокаў па развіцці і ўмацаванні супрацоўніцтва, якое склалася гістарычна.

"Мы рады прымаць у Алімпійскім камітэце Расіі калег з Рэспублікі Беларусь. Мы сёння гаварылі на самыя розныя тэмы, і хачу адзначыць, што дыялог атрымаўся канструктыўным і карысным. Нашы суседзі, калегі, якія выдатна правялі зусім нядаўна II Еўрапейскія гульні, прадаўжаюць падрыхтоўку да Алімпійскіх гульняў у Токіа, кіруючыся, як і ўсе ўдзельнікі алімпійскага руху, інтарэсамі спартсменаў, ствараюць максімальна камфортныя ўмовы для іх выступленняў. У гэтым нашы пазіцыі поўнасцю супадаюць. Менавіта таму мы шмат часу прысвяцілі дэталёваму абмеркаванню тых магчымасцей, якія ёсць у нашых НАКаў, па сумеснай падрыхтоўцы спартсменаў да Алімпійскіх гульняў, не толькі летніх, але і зімовых. Мы таксама гатовы прапанаваць нашым калегам удзел у адукацыйных, маладзёжных і іншых праектах, якія служаць справе развіцця алімпізму, пашырэння алімпійскіх каштоўнасцей і адзінства ўсёй нашай вялікай алімпійскай сям'і", - сказаў чатырохразовы алімпійскі чэмпіён.

Станіслаў Пазнякоў таксама выказаў меркаванне, што такія сустрэчы неабходны для абмену вопытам і выпрацоўкі ўзважаных падыходаў да вырашэння любых пытанняў.

Прэзідэнт НАК Беларусі Віктар Лукашэнка ў час сустрэчы падкрэсліў, што Нацыянальны алімпійскі камітэт Рэспублікі Беларусь і Алімпійскі камітэт Расіі заўсёды звязвалі цёплыя і дружалюбныя адносіны, і па многіх пытаннях развіцця спорту і алімпійскага руху нашы пазіцыі супадаюць.

"Безумоўна, маючыя адбыцца Гульні ў Токіа, а следам за імі і старты ў лютым 2022 года ў Пекіне будуць мець важнейшае значэнне для дзвюх краін. Цікавымі з'яўляюцца прапановы расійскага боку і, у прыватнасці, Міністэрства спорту Расійскай Федэрацыі, па правядзенні сумесных збораў у Сібіры і на Далёкім Усходзе. Беларускі бок у сваю чаргу гатовы аказаць усялякае садзейнічанне ў трэніровачных зборах расійскіх спартсменаў у выпадку неабходнасці. Адзначу, што і нашы спартыўныя базы заўсёды адкрыты для братоў-расіян. Вашы атлеты актыўна выкарыстоўваюць для падрыхтоўкі да важных міжнародных стартаў беларускія цэнтры па алімпійскай падрыхтоўцы "Стайкі", "Раўбічы", цэнтр па фрыстайле і іншыя спартыўныя аб'екты", - сказаў Віктар Лукашэнка.

Прэзідэнт НАК Беларусі падзякаваў Алімпійскаму камітэту Расіі за супрацоўніцтва і падтрымку ў галіне алімпійскай адукацыі, магчымасць удзелу ў праграмах Расійскага міжнароднага алімпійскага ўніверсітэта, за запрашэнне да ўдзелу ў Міжнародным форуме юных алімпійцаў. "Упэўнены, сувязі дзвюх вядучых спартыўных арганізацый у бліжэйшым будучым будуць яшчэ больш умацоўвацца", - адзначыў Віктар Лукашэнка.

Міністр спорту Расійскай Федэрацыі Алег Матыцын лічыць Расію і Беларусь надзейнымі партнёрамі ў галіне фізічнай культуры і спорту, што садзейнічае ўмацаванню братэрскіх, саюзніцкіх адносін дзвюх краін. На яго думку, абмен вопытам у спорце вышэйшых дасягненняў і масавым спорце, сумесныя навуковыя праекты дапамагаюць прагрэсу спартыўнай галіны ў Расіі і Беларусі.

"У кастрычніку 2020 года ў Брэсце была падпісана праграма супрацоўніцтва ў галіне фізічнай культуры і спорту на 2021-2022 гады паміж Расійскай Федэрацыяй і Рэспублікай Беларусь. Мы ўзаемадзейнічаем па пытаннях навукова-метадычнага суправаджэння зборных і арганізоўваем сумесныя зборы. Мы гатовыя разгледзець магчымасць правядзення сумесных збораў на расійскіх базах у Сібіры і на Далёкім Усходзе, дзе ёсць неабходныя інфраструктура і абсталяванне для паспяховай падрыхтоўкі зборных каманд да значных міжнародных спаборніцтваў", - сказаў Алег Матыцын.-0-

Падпісвайцеся на нас у
Twitter
Топ-навіны
З НАМІ НАЙБОЛЬШ ЦІКАВА
Свежыя навіны Беларусі