14 кастрычніка, Мінск /Кар. БЕЛТА/. Валейбалісты "Шахцёра" абыгралі брэсцкі "Заходні Буг" у першым матчы чвэрцьфінальнай стадыі Кубка Беларусі. Матч завяршыўся на карысць каманды Віктары Бекшы - 3:0 (25:16, 25:18, 25:20), паведамляе карэспандэнт БЕЛТА.
Дзеючыя ўладальнікі трафея з горада калійшчыкаў кантралявалі сітуацыю на пляцоўцы ад пачатку і да канца паядынку. Толькі ў трэцяй партыі салігарчане далі магчымасць сапернікам дасягнуць рубяжа дваццаць ачкоў. Залогам перавагі "гарнякоў" стала выдатная гульня на блоку і ў трэцяй зоне. Тон у складзе шматразовых чэмпіёнаў Беларусі задавалі маладыя спартсмены Уладзіслаў Бабкевіч і Яўген Грэцкі.
Па традыцыі, калі вынік паядынку быў практычна зразумелы, настаўнік "Шахцёра" Віктар Бекша даў магчымасць праявіць сябе практычна ўсім ігракам, якія ёсць у яго абойме.
Паядынак у адказ адбудзецца 18 кастрычніка ў 12.00. Пераможца проціборства выйдзе ў паўфінал Кубка Беларусі, які плануецца правесці 12-13 снежня ў Мінску.-0-
