16 верасня, Мінск /Кар. БЕЛТА/. Валейбалісты мінскага "Будаўніка" сёння ў Ніжнім Ноўгарадзе пачнуць другі этап папярэдняй стадыі розыгрышу Кубка Расіі, паведамляе карэспандэнт БЕЛТА.
У першым паядынку віцэ-чэмпіёны Беларусі сустрэнуцца з маскоўскім "Дынама", заўтра згуляюць з лідарам 1-й зоны ніжагародскім клубам АСК, а 18 верасня завершаць папярэдні раўнд матчам з камандай "Югра-Саматлор" з Ніжнявартаўска. На стартавым этапе ў пачатку верасня гэтыя каманды правялі сустрэчы ў Ніжнявартаўску. Беларускія валейбалісты згулялі няўдала, прайграўшы ўсім сапернікам з аднолькавым вынікам 1:3. Турнірнае становішча пасля першага тура: АСК - 8 ачкоў, "Дынама" - 7, "Югра-Саматлор" - 3, "Будаўнік" - 0.
Па выніках двух папярэдніх этапаў барацьбу за трафей прадоўжаць па 3 лепшыя каманды з чатырох груп. На паўфінальнай стадыі, матчы якой пройдуць 3-6 лістапада, 12 клубаў будуць падзелены на тры квартэты, пераможцы якіх выйдуць у вырашальны этап кубкавага розыгрышу, ён пройдзе 25-25 снежня.
У гэтым сезоне валейбалісты "Будаўніка" выступяць у суперлізе расійскага чэмпіянату. Стартавы паядынак мінчане правядуць 1 кастрычніка на сваёй пляцоўцы супраць дзеючых чэмпіёнаў Расіі маскоўскіх дынамаўцаў. На першым этапе 16 каманд правядуць двухколавы турнір з матчамі дома і ў гасцях. Пасля гэтага першая чацвёрка адразу выйдзе ў чвэрцьфінал, а клубы, якія зоймуць 5-12-я месцы, у канцы сакавіка 2023 года правядуць кваліфікацыйныя гульні за астатнія 4 пропускі ў плэй-оф. Мінскі "Будаўнік" гуляў у расійскім чэмпіянаце ў сезоне 2011/2012 і не змог прабіцца ў фінальную стадыю, заняўшы 13-е падагульняючае месца.-0-
