24 лістапада, Мінск /Кар. БЕЛТА/. Валейбалісткі "Уралачкі-НТМК" са Свярдлоўскай вобласці, колеры якой абараняе беларуска Вера Касцючык, выйшлі ў 1/8 фіналу Кубка Еўрапейскай канфедэрацыі валейбола (ЕКВ), паведамляе карэспандэнт БЕЛТА.
Шматразовыя чэмпіёнкі Расіі абыгралі саратаўскі "Пратон" у матчы ў адказ 1/16 фіналу Кубка ЕКВ і выйшлі ў наступную стадыю турніру. Гульня ў Ніжнім Тагіле завяршылася з лікам 3:2 (25:22, 25:19, 22:25, 22:25, 15:10).
Пасля перамогі ў першым матчы з лікам 3:1 падапечным М.Карполя для праходжання ў наступны круг другога па значнасці еўракубкавага турніру ў кантынентальным валейболе трэба было выйграць дзве партыі. З гэтай задачай "саламандры" справіліся ўпэўнена. Не абмежаваўшыся мінімумам для дасягнення мэты, яны пераадолелі гульнявы крызіс, сабраліся пасля пройгрышу наступных адрэзкаў матчу і перамаглі няўступчывую саратаўскую дружыну на тай-брэйку.
Беларуска Вера Касцючык унесла ў гэты поспех сваёй каманды важкі ўклад, зарабіўшы восем ачкоў. Таксама на яе рахунку 48 працэнтаў пазітыўнага прыёму.
Саперніцы адной з самых тытулаваных каманд еўрапейскага жаночага клубнага валейбола вызначацца па выніках сустрэч паміж бельгійскім "Адэргемам" і грэчаскай "Тырай".-0-
