2 красавіка, Мінск /Кар. БЕЛТА/. Валейбалісткі "Мінчанкі" перамаглі саратаўскі "Пратон" у стыкавым матчы за пятае месца з лікам 2:1 (23:25, 25:20, 25:21, 25:16). Такім чынам, падапечныя Станіслава Салікава дабіліся лепшага выніку за час выступлення беларускай каманды ў расійскай суперлізе, паведамляе карэспандэнт БЕЛТА.
Першая партыя прайшла пад дыктоўку саратаўскіх валейбалістак, якія вялі ў рахунку практычна ўсю стартавую партыю. У канцоўцы ў беларускай каманды быў шанц выраўнаваць сітуацыю на пляцоўцы, але атакуючыя дзеянні саперніц звялі іх намаганні на нішто. Кропку ў партыі паставіла ігрок "Пратона" Настасся Бавыкіна.
Другая партыя таксама пачалася з дакладных атак саратаўскіх спартсменак. Але на гэты раз Вікторыя Сакрэтова, Надзея Смірнова, Надзея Сталяр, Таццяна Маркевіч і Надзея Уладыка, выдатна згуляўшы ў атацы, змаглі перахапіць ініцыятыву. Таксама вельмі надзейна ў абароне згуляла лібера "Мінчанкі" Алена Федарынчык, якая падняла некалькі вельмі складаных мячоў. Гульнявы крызіс "Пратона", які пачаўся з сярэдзіны другога сэта, зацягнуўся і каманда Юрыя Марычава была вымушана прызнаць паражэнне.
У пераможцаў самай рэзультатыўнай стала Надзея Смірнова, якая зарабіла 21 пункт. У Надзеі Сталяр - 16 ачкоў. Вікторыя Сакрэтава правяла 13 рэзультатыўных дзеянняў. У Таццяны Маркевіч - 11 ачкоў. Што датычыцца саперніц, то лепшая ў іх Настасся Бавыкіна - 23 пункты. Вікторыя Русу і Яраслава Сіманенка запісалі на свой рахунак па 14 ачкоў.-0-
