12 снежня, Мінск /Кар. БЕЛТА/. Валейбалісткі "Мінчанкі" атрымалі чарговую перамогу ў рамках рэгулярнага чэмпіянату расійскай жаночай Суперлігі, паведамляе карэспандэнт БЕЛТА.
У нядзелю ў сталічным Палацы спорту "Уручча" беларускі прымалі "Спарту" з Ніжняга Ноўгарада. Усе партыі матчу прайшлі па падобным сцэнарыі: большую частку кожнага сэта каманды ішлі мяч у мяч, але ў канцоўках гаспадыні пляцоўкі ішлі ў адрыў, не дазваляючы саперніцам перайсці рубеж 20 набраных ачкоў. Фінальны рахунак - 3:0 (25:20, 25:19, 25:18) на карысць сталічнага клуба.
Гэта перамога стала для "Мінчанкі" трэцяй запар і шостай у бягучым сезоне. Дзякуючы паспяховай серыі дзяўчаты замацаваліся ў плэй-оф жаночай Суперлігі: наша каманда з 17 баламі размяшчаецца на 7-й пазіцыі сярод 14 каманд. Наступны матч у турніры беларускі правядуць 23 снежня ў гасцях у калінінградскага "Лакаматыва".
Таксама напярэдадні ў Мінску чарговы паядынак у рамках чэмпіянату Расіі правялі валейбалісты "Будаўніка "- падапечныя Алега Мікановіча сустракаліся з "Нафтавіком" з Арэнбурга. Па ходзе матчу нашы хлопцы вялі 2:1 па сэтах, але чацвёртая і пятая партыі ўсё ж засталіся за гасцямі. У выніку чарговае паражэнне беларускага клуба - 2:3 (17:25, 25:23, 27:25, 22:25, 10:15). З 4 ачкамі "Будаўнік" ідзе на апошнім 16-м месцы ў Суперлізе, далей нашу каманду чакае выязная гульня супраць кемераўскага "Кузбаса" 16 снежня.-0-
