17 лютага, Мінск /Кар. БЕЛТА/. Венгерскі "Веспрэм" пацярпеў трэцяе паражэнне ў групавым этапе гандбольнай Лігі чэмпіёнаў, паведамляе карэспандэнт БЕЛТА.
У гасцявым паядынку 12-га тура з нямецкім "Магдэбургам" віцэ-чэмпіёны Венгрыі ўступілі з рэзультатам 25:32. У актыве беларускага легіянера "Веспрэма" Мікіты Вайлупава тры дакладныя кідкі. Усяго ў гэтым турніры ён 26 разоў трапляў у вароты сапернікаў. Лідар папярэдняй групы А французскі "Пары Сен-Жэрмен" упэўнена абыграў на сваёй арэне румынскае "Дынама" з Бухарэста - 33:26. Дацкі ГОГ з Гудме перамог у сябе дома польскую "Віслу" з Плоцка з лікам 31:24. Матч паміж "Порту" і "Заграбам" перанесены на больш позні тэрмін, таму што харвацкі клуб па тэхнічных прычынах не змог дабрацца да Партугаліі. Становішча каманд: "Пары Сен-Жэрмен" - 20 ачкоў (12), "Веспрэм" - 16 (12), "Магдэбург" - 16 (12), ГОГ - 13 (12), "Дынама" - 11 (12), "Заграб" - 8 (11), "Вісла" - 7 (12), "Порту" - 3 (11).
У апошнім матчы 12-га тура групы В венгерскі "Пік" перамог у Сегедзе нямецкі "Кіль" з лікам 36:33. Тут дзве пуцёўкі ў чвэрцьфінал ужо забяспечылі сабе дзеючы пераможца чэмпіёнскай Лігі іспанская "Барселона" і фіналіст польскі "Кельцы", у якім выступае беларус Арцём Каралёк. Становішча каманд пасля 12 гульнявых дзён: "Барселона" - 23 ачкі, "Кельцы" - 20, "Нант" - 14, "Кіль" - 12, "Пік" - 10, "Ольбарг" - 9, "Цэле" - 6, "Эльверум" - 2.
Пасля фінішу групавога раўнда ў сакавіку па дзве лепшыя каманды адразу выйдуць у чвэрцьфінал. Клубы, якія зоймуць 3-6-я месцы, згуляюць у першым раўндзе плэй-оф. "Фінал чатырох" чэмпіёнскай Лігі пройдзе 17-18 чэрвеня ў нямецкім Кёльне. У вырашальным паядынку мінулага сезона "Барселона" перамагла "Кельцы" ў серыі пасляматчавых пенальці, выйграўшы галоўны турнір Старога Свету 11-ы раз.-0-
