10 мая, Мінск /Кар. БЕЛТА/. Саюз Еўрапейскіх футбольных асацыяцый (УЕФА) зацвердзіў новы фармат Лігі чэмпіёнаў з удзелам 36 клубаў з сезона 2024/2025, паведамляе прэс-служба УЕФА.
Замест групавога этапу каманды будуць гуляць па так званай швейцарскай сістэме, а колькасць удзельнікаў павялічыцца з 32 да 36. На асноўным этапе турніру ўсе клубы будуць змешчаны ў адзіную табліцу, дзе кожная каманда правядзе па 8 матчаў. Васьмёрка лепшых клубаў гарантуе выхад у 1/8 фіналу, наступныя 16 каманд будуць змагацца за выхад у гэту стадыю ў дадатковым раўндзе. Аналагічным чынам зменіцца фармат правядзення Лігі Еўропы і Лігі канферэнцый.
"Сённяшнія рашэнні завяршаюць доўгі працэс кансультацый, у ходзе якога мы выслухалі меркаванні балельшчыкаў, ігракоў, трэнераў, нацыянальных асацыяцый, клубаў і ліг, каб знайсці лепшы фармат для развіцця і поспеху еўрапейскага футбола. Мы перакананы, што выбраны фармат забяспечыць правільны баланс, узмоцніць канкурэнцыю і прынясе значныя даходы, якія можна будзе размеркаваць паміж клубамі і лігамі і накіраваць у масавы футбол", - пракаменціраваў новаўвядзенні прэзідэнт УЕФА Аляксандр Чаферын.-0-
