16 чэрвеня, Мінск /Кар. БЕЛТА/. Удзельнікаў Гульняў у Токіа могуць дэпартаваць за парушэнне антыкаранавірусных правіл, паведамілі БЕЛТА ў прэс-службе НАК Беларусі.
Такія патрабаванні змешчаны ў абноўленым зводзе правіл арганізатараў для атлетаў, апублікаваным на афіцыйным сайце МАК. Адзначаецца, што ў выпадку грубых парушэнняў абмежавальных мер, накіраваных на прадухіленне распаўсюджвання каранавіруса, прадугледжваюцца штрафы, адхіленне ад удзелу ў спаборніцтвах і прымусовая дэпартацыя. Да ліку парушэнняў адносяцца адмова насіць маску, выконваць дыстанцыю; наведванне месцаў, загадзя не адобраных для наведвання арганізатарамі; адмова праходзіць медыцынскі агляд.
Абноўленыя правілы для журналістаў, якія маюць намер асвятляць Гульні, а таксама для членаў дэлегацый і абслуговага персаналу зборных будуць таксама апублікаваны на гэтым тыдні.
XXXII Алімпіяда ў Токіа пройдзе з 23 ліпеня па 8 жніўня, Паралімпіяда - з 24 жніўня па 5 верасня 2021 года. Агульны бюджэт Алімпійскіх і Паралімпійскіх гульняў у Токіа з-за пераносу стартаў на год павялічыўся да $15,8 млрд.-0-
