21 лютага, Мінск /Кар. БЕЛТА/. У "Раўбічах" створаны камфортныя ўмовы для спаборніцтваў лыжных акрабатаў. Такое меркаванне выказаў каардынатар Міжнароднай федэрацыі лыжнага спорту (ФІС) Джозеф Фіцджэральд на прэс-канферэнцыі, прысвечанай правядзенню ў Мінску этапу Кубка свету па фрыстайле, перадае карэспандэнт БЕЛТА.
"Арганізатарамі створаны камфортныя ўмовы для спаборніцтваў лыжных акрабатаў. Гэта датычыцца як падрыхтоўкі схілу, так і ўмоў пражывання. Беларускаму боку ўдалося выканаць галоўны прынцып: пры мінімуме снегу, які неабходны для правядзення стартаў, ён вельмі якасны. Мы давяраем арганізатарам і ўпэўнены, што ўсе каманды выступяць у Мінску з вялікім задавальненнем", - адзначыў каардынатар ФІС.
Этап Кубка свету па фрыстайле пройдзе ў РЦАП "Раўбічы" 22-23 лютага. Вырашальная стадыя спаборніцтваў пачнецца ў суботу ў 19.00. На наступны дзень адбудзецца турнір па сінхронных скачках.-0-
