ДЗЯРЖОРГАНЫДЗЯРЖОРГАНЫ
Пятніца, 23 кастрычніка 2020
Мінск Суцэльная воблачнасць +11°C
Усе навіны
Усе навіны
Спорт
15 кастрычніка 2020, 11:25

У НАК Беларусі прайшла экскурсія для шматдзетных маці і іх дзяцей

15 кастрычніка, Мінск /Кар. БЕЛТА/. Жанчыны з Мінскай вобласці, узнагароджаныя ордэнам Маці, разам са сваімі дзецьмі азнаёміліся з гісторыяй развіцця алімпійскага руху ў Рэспубліцы Беларусь і дасягненнямі айчынных атлетаў у час экскурсіі 14 кастрычніка па штаб-кватэры НАК Беларусі, прымеркаванай да Дня маці, паведамілі БЕЛТА ў прэс-службе арганізацыі.

Наведвальнікі азнаёміліся з экспазіцыяй Алімпійскага музея, у якой дастойнае месца займаюць касцюм чатырохразовай алімпійскай чэмпіёнкі па біятлоне Дар'і Домрачавай, узнагароды чатырохразовай алімпійскай чэмпіёнкі па фехтаванні Алены Бяловай, трохразовага алімпійскага чэмпіёна па вольнай барацьбе Аляксандра Мядзведзя, алімпійскага чэмпіёна Аляксандра Багдановіча і многіх іншых атлетаў, якія кавалі славу айчыннага спорту.

Шматдзетныя маці разам з дзецьмі падзяліліся ўражаннямі па выніках наведвання штаб-кватэры.

"Упершыню ў Нацыянальным алімпійскім камітэце Рэспублікі Беларусь, дзецям спадабалася экспазіцыя, асабліва інтэрактыўная зона, дзе яны паспрабавалі сябе ў розных спаборніцтвах. Несумненна, будзем далучаць нашых дзяцей да спорту, да заняткаў фізічнай культурай, каб раслі здаровымі. Наш тата - заўзяты балельшчык - сочыць за спортам, Алімпійскімі гульнямі. Ён і будзе прыцягваць", - адзначыла ў гутарцы з прэс-службай НАК маці пяцярых дзяцей Алена Рудакоўская.

"Сёння нам уручылі ордэны Маці, вядома, уражанні самыя яркія. Прыемным сюрпрызам стала і наведванне НАК Беларусі. Мае дзеці імкнуцца займацца, у прыватнасці, дачка захапляецца гімнастыкай. Глядзім часам спартыўныя трансляцыі, перажывалі ў біятлоне за выступленні Дар'і Домрачавай", - сказала Таццяна Корсак.

Школьнік Дзмітрый Барташ прыехаў у НАК Беларусі разам з мамай Наталляй, якая таксама была ўдастоена ордэна Маці. "Захапляюся футболам і баскетболам, у будучым не супраць стаць прафесійным іграком, але гэта ўжо як атрымаецца. Куміры, вядома, Крышціяну Раналда, Мэсі. Браты таксама захапляюцца спортам, а сёстры яшчэ маленькія, каб займацца. У НАК Беларусі прыехаў упершыню, для мяне тут усё незвычайнае і прыгожае", - з захапленнем расказаў вучань 7 класа сярэдняй школы нумар 5 Слуцка.

У мерапрыемстве прыняла ўдзел і бронзавы прызёр Гульняў у Афінах, васьміразовая чэмпіёнка свету і шматдзетная маці Наталля Цылінская, якая сустрэлася са шматдзетнымі маці і адказала на іх пытанні.

"У мяне чацвёра дзяцей, але калі глядзіш на маці, у якіх яшчэ больш дзяцей, то паважаеш іх бязмерна. Адбылася цёплая размова, мы падзяліліся меркаваннямі, як выхоўваць сваіх дзетак. Яны ўсе цудоўныя і любяць сваіх бацькоў. Спадзяюся, юнакі і дзяўчаты ўсе знойдуць свой правільны жыццёвы шлях, хто ў спорце, хто ў іншых сферах. Галоўнае - вырастуць сапраўднымі грамадзянамі нашай краіны. На прыкладзе нашых атлетаў дзеці разам з бацькамі змаглі пераканацца, што перамог у жыцці можна дасягнуць толькі за кошт настойлівай працы", - расказала Наталля Цылінская.

Усяго ў экскурсіі прынялі ўдзел 25 шматдзетных сем'яў з Мінскай вобласці c дзецьмі ад 10 да 16 гадоў.-0-

Падпісвайцеся на нас у
Twitter
Топ-навіны
З НАМІ НАЙБОЛЬШ ЦІКАВА
Свежыя навіны Беларусі