22 лютага, Мінск /Кар. БЕЛТА/. У НАК Беларусі адбыліся провады спартыўнай дэлегацыі Рэспублікі Беларусь на ІІ Зімовыя міжнародныя спартыўныя гульні "Дзеці Азіі", паведамляе карэспандэнт БЕЛТА.
У беларускую каманду ўвайшлі 68 юных спартсменаў да 16 гадоў у 8 відах спорту: хакей з шайбай, снаўборд, скачкі на лыжах з трампліна, лыжныя гонкі, шорт-трэк, фігурнае катанне, канькабежны і гарналыжны спорт. Сярод атлетаў - чэмпіёны і прызёры Беларусі, рэкардсмены па відах спорту ў сваіх узроставых катэгорыях. З улікам трэнерскага, медыцынскага і адміністрацыйнага персаналу агульная колькасць беларускай дэлегацыі склала больш за 90 чалавек. У ходзе сустрэчы з пажаданнямі да ўдзельнікаў спаборніцтваў звярнуўся Прэзідэнт НАК Беларусі Віктар Лукашэнка.
"Наша каманда ўпершыню прыме ўдзел у гэтых прэстыжных міжнародных спаборніцтвах, дзе таксама выступяць мацнейшыя спартсмены з Расійскай Федэрацыі і іншых краін Азіі, - адзначыў кіраўнік НАК. - У вас ёсць магчымасць атрымаць каштоўны спаборніцкі вопыт, набыць новых сяброў і азнаёміцца з новымі месцамі, але самае галоўнае - гэта паказаць свету тое, чаму вы так доўга вучыліся і што ў вас уклалі трэнеры і бацькі. Хачу падкрэсліць, што вы зможаце выступаць пад нацыянальным сцягам. Наша дзяржава ўкладвае шмат сіл у дзіцяча-юнацкі спорт, таму, вядома, мы чакаем ад вас добрых рэзультатаў. Жадаю вам дабіцца ўсіх мэт, якія вы перад сабой паставілі, і нагадаць, што фартуна ўсміхаецца толькі тым, хто хоча дабіцца поспеху, таму ўсё залежыць ад вас. Ведайце, за вас будуць балець не толькі вашы родныя і блізкія, але і ўся краіна. Удачы!".
Другія зімовыя Міжнародныя спартыўныя гульні "Дзеці Азіі" пройдуць з 23 лютага па 5 сакавіка ў Кемераве, Новакузнецку, Міжрэчанску і Таштагольскім раёне Кемераўскай вобласці. Удзельнікамі спаборніцтваў стануць 865 юных спартсменаў з 13 краін, усяго на Гульнях будзе разыграна 57 камплектаў медалёў у дзесяці відах спорту.-0-
