9 верасня, Мінск /Кар. БЕЛТА/. 9 верасня ў Мінску завяршыўся фінальны этап рэспубліканскага турніру юных футбалістаў "Скураны мяч", паведамляе карэспандэнт БЕЛТА.
У вырашальным паядынку спаборніцтваў дзяўчынак 2010-2012 гадоў нараджэння гомельская каманда "Рысь" адолела ў серыі пасляматчавых пенальці равесніц з "Казаначкі" (Іванаўскі раён). Трэцяе месца занялі дзяўчаты з Гродзенскага раёна.
У турніры хлопчыкаў малодшай узроставай групы (2011-2012 г.н.) футбалісты Слонімскага РФСК перамаглі мінскі "Партызан" з лікам 7:2. Бронзу заваявалі "Лельчыцкія зубры".
У сярэдняй групе (2009-2010 г.н.) "Талент" са Слонімскага раёна выйграў у ФК "Юрген" з Клімавіцкага раёна - 5:0. У гульні за 3-е месца сталічны "Партызан" абыграў "Юнацтва" з Лепельскага раёна з вынікам 2:0.
У фінальнай сустрэчы старэйшай узроставай групы (2007-2008 г.н.) ігракі з клуба "Палессе" (Столінскі раён) упэўнена абыгралі каманду "Юніёры" з Лельчыцкага раёна з лікам 3:0. У матчы за бронзавыя ўзнагароды гродзенскі "Алмаз" перамог "Юнацтва" з Лепельскага раёна - 4:0.
У рэспубліканскім фінале выступілі 32 наймацнейшыя каманды з усіх рэгіёнаў Беларусі, якія прайшлі сіта адборачных этапаў. Гэта сапраўднае футбольнае свята для ўсіх яго ўдзельнікаў, бо акрамя прыгожай гульні і незабыўных уражанняў удзельнікі забралі з сабой бясцэнны вопыт, а таксама разнастайныя прызы і памятныя падарункі ад Прэзідэнцкага спартыўнага клуба.
Турнір "Скураны мяч" упершыню быў праведзены ў Савецкім Саюзе ў 1964 годзе, прычым першым пераможцам Усесаюзнага фіналу стала мінская каманда "Чайка". Пасля распаду СССР спаборніцтвы юных футбалістаў у Беларусі былі адроджаны ў 1997 годзе. У іх могуць удзельнічаць толькі тыя, хто не займаецца ў спецыялізаваных футбольных школах і акадэміях.
Арганізатарамі спаборніцтваў з'яўляюцца Прэзідэнцкі спартыўны клуб, Міністэрства спорту і турызму, Міністэрства адукацыі, асацыяцыя "Беларуская федэрацыя футбола" і БРСМ.-0-
