18 лістапада, Мінск /Кар. БЕЛТА/. У сталіцы стартаваў адкрыты міжнародны турнір па грэка-рымскай барацьбе памяці алімпійскага чэмпіёна Рыма-1960 Алега Караваева, паведамляе карэспандэнт БЕЛТА.
У бягучым годзе спаборніцтвы праводзяцца ўжо 29-ы раз і пройдуць на "Чыжоўка-Арэне" ў фармаце асабістага турніру ва ўсіх вагавых катэгорыях. Удзел у спаборніцтвах прымуць мацнейшыя прадстаўнікі грэка-рымскага стылю з Беларусі, Расіі і іншых краін СНД. У якасці пачэсных гасцей у Мінск запрошаны алімпійскія чэмпіёны Аляксандр Карэлін і Міхаіл Маміяшвілі.
Сёння на турніры памяці Алега Караваева адбудуцца першыя папярэднія паядынкі і паўфіналы, заўтра пройдуць фіналы ў пяці вагавых катэгорыях, завершацца спаборніцтвы ў нядзелю вырашальнымі схваткамі ў яшчэ пяці катэгорыях. Акрамя таго, у гэтыя дні пройдуць і спаборніцтвы для юніёраў - рэспубліканскі турнір па грэка-рымскай барацьбе "Каравайчык".
Уваход на трыбуны "Чыжоўка-Арэны" для гледачоў свабодны, усе жадаючыя змогуць бясплатна паглядзець схваткі на відэасэрвісе VOKA.-0-
