9 лютага, Мінск /Кар. БЕЛТА/. У мінскім Доме футбола прайшоў рэгіянальны семінар UEFA GROW з удзелам футбольных спецыялістаў Арменіі, Азербайджана, Грузіі, Расіі, Казахстана і Малдовы, паведамілі карэспандэнту БЕЛТА ў асацыяцыі "Беларуская федэрацыя футбола".
У сувязі з каранавіруснымі праблемамі прадстаўнікі Украіны, а таксама некаторыя запрошаныя эксперты ўдзельнічалі ў семінары ў рэжыме анлайн. Старшыня АБФФ Уладзімір Базанаў адзначыў важнасць супрацоўніцтва ў рамках праекта UEFA GROW, які дапамагае футбольным асацыяцыям абменьвацца вопытам. У мерапрыемстве прынялі ўдзел прадстаўнік дэпартамента нацыянальных асацыяцый УЕФА Ілья Кіціч і іншыя спецыялісты Саюза еўрапейскіх футбольных асацыяцый.
UEFA GROW - цэнтральная праграма падтрымкі і развіцця футбола ў Еўропе. Яна прапануе індывідуальныя кансультацыйныя паслугі нацыянальным асацыяцыям у найбольш актуальных галінах: ад стварэння лепшага іміджу футбола да павелічэння магчымасцей атрымання даходаў і прыцягнення большай колькасці людзей да гульні нумар адзін.
Рэгіянальны семінар у беларускай сталіцы стаў пятым для прадстаўнікоў краін усходняй Еўропы. Раней такія рабочыя форумы праходзілі ў Малдове, Азербайджане, Грузіі і Казахстане.-0-