7 снежня, Брэст /Кар. БЕЛТА/. Турнір па сілавых відах спорту "Гран-пры "Брэсцкая крэпасць" пройдзе 11 снежня на вяслярным канале ў Брэсце, паведаміў карэспандэнту БЕЛТА спецыяліст па сувязях з грамадскасцю абласнога цэнтра алімпійскага рэзерву па вяслярстве Алег Голас.
Заяўку на ўдзел у спаборніцтвах падалі каля 30 атлетаў з Беларусі і Расіі. У прыватнасці, на памост плануюць выйсці спартсмены з Мінска, Брэста, Віцебска, Гомеля, горада Вольска Саратаўскай вобласці. Удзельнікі выступяць у дзвюх узроставых катэгорыях - моладзь і ветэраны. Цікава, што і ў першай, і ў другой групе будуць прадстаўніцы прыгожага полу.
Турнір-шоу асілкаў пройдзе па міжнародных правілах у фітнес-зале ЦАР. Пачатак спаборніцтваў - у 11.00. У праграме заяўлены чатыры віды спартыўных дысцыплін: жым штангі лежачы, жым штангі лежачы ў софт-экіпіроўцы, пад'ём штангі на біцэпс (класічны) і народны жым. Зрэшты, спартыўна-патрыятычнае мерапрыемства абяцае быць відовішчным не толькі спаборніцкімі момантамі.
"Турнір па сілавых відах спорту на базе нашага комплексу адбудзецца другі раз. Упершыню такія спаборніцтвы прайшлі ў жніўні і былі прымеркаваны да Дня паветрана-дэсантных войскаў. На гэты раз арганізатары маюць намер зрабіць акцэнт не на масавасць, а на відовішчнасць у саперніцтве дзвюх груп удзельнікаў. Нам абяцаюць сапраўднае сілавое шоу з яркай канцэртнай праграмай", - адзначыў Алег Голас.
Арганізатар мерапрыемства - аўтаномная некамерцыйная арганізацыя "Нацыянальная асацыяцыя паўэрліфтынгу" пры падтрымцы Брэсцкага абласнога цэнтра алімпійскага рэзерву па вяслярстве і Брэсцкага гарвыканкама.-0-
