24 студзеня, Мінск /Кар. БЕЛТА/. Тры беларускія гандбалісты могуць трапіць у сімвалічную зборную чэмпіянату Еўропы, які завяршаецца ў шведскай сталіцы, паведамляе карэспандэнт БЕЛТА.
У лік 40 прэтэндэнтаў на 7 пазіцый увайшлі паўсярэдні зборнай Беларусі Уладзіслаў Кулеш, лінейны Арцём Каралёк і правы крайні Мікіта Вайлупаў, які з 42 галамі займае другое месца ў спісе лепшых снайпераў кантынентальнага першынства.
Галасаванне на сайце Еўрапейскай федэрацыі гандбола завершыцца 25 студзеня, а канчатковы склад сімвалічнай зборнай 14-га чэмпіянату Старога Свету ЕГФ аб'явіць у апошні дзень турніру 26 студзеня.
Сёння ў Стакгольме адбудуцца два паўфіналы: Нарвегія - Харватыя, Іспанія - Славенія. Пераможцы паўфінальных баталій 26 студзеня сустрэнуцца ў вырашальным паядынку за чэмпіёнскі тытул, а няўдачнікі 25 студзеня паспаборнічаюць за бронзавыя ўзнагароды. У суботу зборныя Германіі і Партугаліі правядуць матч за 5-е падагульняючае месца.
Два гады таму ў Харватыі золата еўрапейскага першынства заваявалі гандбалісты Іспаніі, якія перамаглі ў фінале каманду Швецыі (29:23), бронзавымі прызёрамі сталі французы, якія перамаглі датчан (32:29). Зборная Беларусі заняла 10-е падагульняючае месца, як і на цяперашнім турніры. Лепшым рэзультатам беларускіх гандбалістаў на чэмпіянатах Еўропы з'яўляецца 8-е месца, заваяванае ў 1994 годзе ў Партугаліі.-0-