9 лістапада, Мінск /Кар. БЕЛТА/. У мексіканскай Гвадалахары адбылася жараб'ёўка груп 50-га падагульняючага турніру Жаночай тэніснай асацыяцыі (WTA), паведамляе карэспандэнт БЕЛТА.
Дэбютант гэтых спаборніцтваў лепшая беларуская тэнісістка, другая ракетка планеты Арына Сабаленка на папярэднім этапе згуляе ў групе "Чычэн-Іца", дзе яе саперніцамі будуць грачанка Марыя Сакары (6-ы нумар сусветнага рэйтынгу), полька Іга Свёнтак (9) і іспанка Паўла Бадоса (10). У групе "Тэатыўакан" выступяць дзве чэшскія тэнісісткі - Барбара Крэйчыкава (3) і Караліна Плішкава (4), іспанка Гарбінье Мугуруса (5), а таксама эстонка Анет Кантавейт (8). Квартэты названы ў гонар старажытных мексіканскіх гарадоў.
Сустрэчы групавога этапу пройдуць з 10 па 15 лістапада, пасля чаго па дзве лепшыя тэнісісткі з кожнага квартэта 16 лістапада правядуць паўфінальныя матчы, пераможцы якіх 17 лістапада сустрэнуцца ў фінальным паядынку. Агульны прызавы фонд падагульняючага турніру WTA 2021 года складзе $5 млн.
У 2019 годзе пераможцай жаночага падагульняючага турніру, які прымаў кітайскі Шэньчжэнь, стала цяперашні лідар сусветнага рэйтынгу аўстралійка Эшлі Барці, якая абыграла ў фінале ўкраінскую тэнісістку Эліну Світоліну. У бягучым сезоне Эшлі Барці вырашыла не выступаць у Гвадалахары па стане здароўя і не зможа абараніць свой тытул. У мінулым годзе спаборніцтвы лепшых тэнісістак планеты былі адменены з-за пандэміі COVID-19. Больш за ўсіх падагульняючы турнір WTA выйгравала чэшка Марціна Наўрацілава, у актыве якой 8 перамог. Па пяць тытулаў у немкі Штэфі Граф і амерыканкі Серэны Уільямс. У 2011 годзе беларуска Вікторыя Азаранка дабралася да фіналу, у якім уступіла чэшскай тэнісістцы Петры Квітавай.-0-
