23 кастрычніка, Мінск /Кар. БЕЛТА/. На анлайн-пасяджэнні выканкама Еўрапейскіх алімпійскіх камітэтаў (ЕАК) была прадстаўлена канцэпцыя стратэгічнага развіцця арганізацыі да 2030 года, паведамілі БЕЛТА ў прэс-службе НАК Беларусі.
Дакумент прадставіў генеральны сакратар НАК Сербіі Джорджэ Вішацкі. Больш дэталёвае абмеркаванне канцэпцыі і іншыя пытанні дзейнасці ЕАК будуць у цэнтры ўвагі ўдзельнікаў 49-й Генеральнай асамблеі гэтай арганізацыі, якую плануецца правесці 27 лістапада ў Рыме. У якім фармаце адбудзецца мерапрыемства стане вядома ў бліжэйшы тыдзень: усё залежыць ад эпідэміялагічнай сітуацыі ў Еўропе.
Таксама на пасяджэнні выканкама ЕАК была прадстаўлена абноўленая інфармацыя аб падрыхтоўцы да III Еўрапейскіх гульняў у Кракаве, Еўрапейскіх юнацкіх Алімпійскіх фестываляў (ЕЮАФ) у гарадах Вуакаці, Банска-Бістрыца і іншых стартаў. Дырэктар офіса ЕАК у ЕС Фолькер Хелмунд адзначыў, што сродкі на падтрымку зімовага ЕЮАФ у Вуакаці, які перанесены на снежань 2021, былі атрыманы ад Еўрапейскага саюза.
Пасяджэнне правялі выконваючы абавязкі прэзідэнта ЕАК Нільс Нігаард і генеральны сакратар Рафаэле Паньёці, якія расказалі аб дзейнасці офіса ЕАК у Рыме.
Таксама быў прадстаўлены новы лагатып прэміі Пятра Нуроўскага, якая ўручаецца маладым еўрапейскім атлетам.-0-
