24 мая, Мінск /Кар. БЕЛТА/. Кіраўнік Федэрацыі хакея Беларусі Дзмітрый Баскаў пракаменціраваў інцыдэнт з заменай дзяржаўнага сцяга Рэспублікі Беларусь у сталіцы Латвіі, дзе праходзіць чэмпіянат свету па хакеі, паведамілі БЕЛТА ў прэс-службе грамадскай арганізацыі.
"Федэрацыя хакея Беларусі лічыць жэст рыжскай адміністрацыі актам глыбокай непавагі і беспрэцэдэнтнага націску ў адносінах да спартсменаў, якія прадстаўляюць нашу краіну на чэмпіянаце свету па хакеі - 2021. Як мы неаднаразова падкрэслівалі раней, наша каманда паехала на турнір, каб даказаць моц нашай краіны на спартыўнай пляцоўцы, а не з палітычнай трыбуны, на якую ўсяляк спрабавалі яе зацягнуць яшчэ ў перыяд падрыхтоўкі да сумеснага з Латвіяй правядзення чэмпіянату. Мы глыбока абураны, што пры адсутнасці палітычнага інструментарыя прадстаўнікі замежных дзяржаў лічаць магчымым зрабіць спорт пляцоўкай палітычных разбораў", - сказаў Дзмітрый Баскаў.
ФХБ ужо накіравала афіцыйную ноту ў адрас прэзідэнта Міжнароднай федэрацыі хакея Рэнэ Фазеля, аргкамітэта чэмпіянату свету ў Рызе і кіраўніцтва Федэрацыі хакея Латвіі. Паводле слоў кіраўніка ФХБ, замена дзяржаўнага сцяга Рэспублікі Беларусь у пуле сцягоў краін - удзельніц турніру і афіцыйных сімвалаў чэмпіянату з'яўляецца ні чым іншым як спробай палітызаваць сусветны хакейны форум у Рызе і супярэчыць спартыўнаму характару чэмпіянату.
"Нам таксама вядома аб несанкцыянаваных пікетах у месцах знаходжання нашай каманды. Усе гэтыя факты парушаюць кодэкс паводзін ІІХФ, якіх павінны прытрымлівацца і краіны - арганізатары турніраў пад эгідай Міжнароднай федэрацыі хакея. Таму цяпер мы сур'ёзна занепакоены бяспекай нашых ігракоў у Рызе і спадзяёмся, што ІІХФ зможа забяспечыць не толькі дадатковыя меры абароны каманды ад знешняга націску, але і выкананне ўласных нарматыўных актаў", - рэзюмаваў Дзмітрый Баскаў.-0-
