30 мая, Мінск /Кар. БЕЛТА/. Спартсмены "Сталіцы" атрымалі валявую перамогу ў гасцях у гомельскага ВРЗ - 4:3 і выйшлі наперад у фінальнай серыі 34-га чэмпіянату Беларусі па міні-футболе, паведамляе карэспандэнт БЕЛТА.
Першая гульня за чэмпіёнскі тытул пачалася з націску гаспадароў пляцоўкі, і ўжо да 5-й мінуты яны двойчы паразілі вароты мінчан: лік адкрыў Іван Заяц-Маціеўскі, а потым вызначыўся Дзмітрый Лось. Госці не збіраліся здавацца, і на 13-й мінуце Алег Гарбенка скараціў разрыў, а ў пачатку другога тайма ён жа аднавіў парытэт. Пасля гэтага абедзве каманды шмат атакавалі, але ў выніку поспеху дабіліся мінчане. На 31-й мінуце сустрэчы Аляксандр Умпіровіч забіў трэці мяч у вароты ВРЗ, а на апошняй мінуце асноўнага часу вызначыліся галкіперы: Максім Трафімовіч чацвёрты раз паразіў вароты гамяльчан, а потым яго калега Юрый Дзегцярэнка ўстанавіў канчатковы рэзультат - 4:3 на карысць дзеючых чэмпіёнаў краіны. Другі паядынак залатой серыі адбудзецца 2 чэрвеня ў мінскім спартыўным комплексе "Уручча", а 6 чэрвеня каманды зноў сустрэнуцца ў Гомелі. Серыя за золата прадоўжыцца да трох вікторый адной з каманд. У паўфіналах ВРЗ быў мацнейшы за "Мінск", "Сталіца" перамагла гомельскі БЧ.
У стартавым матчы серыі за бронзавыя ўзнагароды "Мінск" на выездзе перамог БЧ у авертайме - 5:3. У першы дзень лета каманды згуляюць на пляцоўцы "Уручча". Бронзавая серыя праходзіць да дзвюх перамог.
У мінулым сезоне "Сталіца" заваявала сваё чацвёртае золата, атрымаўшы перамогу ў фінальнай серыі над ВРЗ - 3:0. Уладальнікам бронзавых узнагарод упершыню стаў "Мінск", які перамог гродзенскае "УУС-Дынама". Больш за ўсё чэмпіёнскіх тытулаў у актыве мінскага "Дарожніка", які шэсць разоў выйграваў залатыя медалі, аршанскі "Вітэн" з'яўляецца пяціразовым чэмпіёнам.-0-
