25 кастрычніка, Мінск /Кар. БЕЛТА/. Спартсмены мінскай "Сталіцы" чацвёрты раз прымуць старт у розыгрышы Лігі чэмпіёнаў па міні-футболе, паведамляе карэспандэнт БЕЛТА.
Сёння ў косаўскай Прышціне ў першым паядынку 6-й кваліфікацыйнай групы (В) чэмпіёны Беларусі сустрэнуцца з польскім клубам "Пяст" з горада Глівіцы. Гэты паядынак будуць судзіць італьянка Кіяра Пероні і славенец Адмір Захавіч. Рэзервовы арбітр - румын Улад Чабану. Заўтра сапернікам мінчан будзе дацкі "Гентофтэ", а 28 кастрычніка падапечныя Аляксандра Чыбісава завершаць турнір сустрэчай з косаўскім "Лічэні".
Склады астатніх квартэтаў В:
5 - "Мостар" (Боснія і Герцагавіна), "Эрэбру" (Швецыя), "Лозніца-Град" (Сербія), "Араз" (Нахічэвань, Азербайджан);
7 - "Жальгірыс" (Каўнас, Літва), "Эбалі" (Італія), "Петроу" (Елгава, Латвія), "Кампуксен Дынама" (Фінляндыя);
8 - "Шкупі" (Паўночная Македонія), "Хрудзім" (Чэхія), "Лучанец" (Славакія), "Дыферданж" (Люксембург).
З гэтых груп у элітны раўнд выйдуць толькі пераможцы. Яны далучацца да 12 лепшых клубаў А. Матчы элітнага раўнда, пасля якога вызначацца ўдзельнікі "Фіналу чатырох", пройдуць у лістападзе.
У мінулыя гады "Сталіца" двойчы прабівалася ў элітны раўнд чэмпіёнскай Лігі. У папярэднім сезоне пераможцам Лігі чэмпіёнаў чацвёрты раз у гісторыі стала іспанская "Барселона", больш тытулаў толькі ў яшчэ аднаго іспанскага клуба "Інтэр Мовістар", які пяць разоў выйграваў галоўны кантынентальны турнір.-0-
