29 чэрвеня, Мінск /Кар. БЕЛТА/. Спаборніцтвы па грэплінгу ADCC адновяцца ў Беларусі з ліпеня. Аб гэтым карэспандэнту БЕЛТА расказаў старшыня Беларускай федэрацыі грэплінга Вахтанг Сахадзэ.
"Першапачаткова федэрацыя планавала пачаць турніры з чэрвеня, але пандэмія каранавіруса ўнесла свае карэктывы. Цяпер мы бачым паляпшэнне санэпідабстаноўкі. Думаю, у ліпені ўжо будуць праведзены першыя пасля доўгага перапынку спаборніцтвы, - сказаў Вахтанг Сахадзэ. - БФГ арганізавала 27 чэрвеня "адкрыты дыван", дзе прысутнічала шмат жадаючых пабароцца. Грэплеры ўжо згаладаліся па духу спаборніцтваў, таму паядынкі былі бескампрамісныя". Кіраўнік БФГ адзначыў, што сезон-2020 атрымаўся "скомканы", тым не менш у гэтым годзе будзе праведзена максімальна магчымая колькасць турніраў. Паводле яго слоў, гэта павінна дапамагчы спартсменам як мага хутчэй вярнуцца ў звычайнае рэчышча.
Вахтанг Сахадзэ нагадаў: кульмінацыяй спаборніцкага сезона стане кантынентальны форум у Кішынёве, які плануюць правесці 3 кастрычніка. Чэмпіянат Еўропы па грэплінгу ADCC стане адборам на сусветны форум.
Раней прэзідыум ГА "Беларуская федэрацыя грэплінга" прыслухаўся да рэкамендацый Сусветнай федэрацыі ADCC, Міністэрства спорту і турызму, Міністэрства аховы здароўя і адклаў усе турніры рэспубліканскага календара да стабілізацыі эпідэміялагічнай сітуацыі ў свеце.
Грэплінг - від спартыўнага адзінаборства, які сумяшчае тэхніку ўсіх барцоўскіх дысцыплін з мінімальнымі абмежаваннямі па выкарыстанні болевых і ўдушлівых прыёмаў. Ён не ўключае ў сябе нанясенне ўдараў і выкарыстанне зброі.-0-
