20 снежня, Мінск /Кар. БЕЛТА/. Шведскі галкіпер Юнас Энрат пакінуў мінскае "Дынама". Кантракт скасаваны па ўзаемнай згодзе. Такая інфармацыя размешчана на афіцыйным сайце "зуброў", паведамляе карэспандэнт БЕЛТА.
"Нам няпроста далося гэта рашэнне, - адзначыў генеральны дырэктар беларускага клуба ў КХЛ Дзмітрый Баскаў. - Мы ўдзячныя Юнасу за вялікі адрэзак гісторыі клуба, звязаны з яго выступленнем, але цяпер нам хацелася б рухацца далей. У бліжэйшай перспектыве плануем больш гульнявой практыкі даць беларускім варатарам. Аляксандр Асіпкоў паступова аднаўляецца пасля траўмы, вярнуўся з "маладзёжкі" Мікіта Талапіла. Наперадзе мінскі чэмпіянат свету 2021 года, і пытанне аб тым, хто будзе абараняць вароты нашай зборнай, адкрыта".
Шведскі галкіпер правёў 134 матчы ў складзе "зуброў" з каэфіцыентам надзейнасці 2,51 і 91,2 працэнта адбітых кідкоў. У бягучым сезоне Юнас Энрат згуляў у 30 матчах (89,1 працэнта), перапісаўшы некалькі клубных рэкордаў, у тым ліку па колькасці матчаў сярод галкіпераў (134), перамог сярод галкіпераў (39) і працягласці сухой серыі (166:07). У бягучым сезоне швед двойчы згуляў на нуль, а таксама аддаў дзве галявыя перадачы. Хакеіст прызнаваўся галкіперам тыдня КХЛ у кастрычніку 2017 года. У сезонах 2017/18 і 2018/19 быў названы лепшым іграком "Дынама" па версіі балельшчыкаў.-0-
