24 студзеня, Мінск /Кар. БЕЛТА/. Трыма матчамі ў Віцебску, Наваполацку і Оршы прадоўжыўся 23 студзеня рэгулярны чэмпіянат беларускай хакейнай экстралігі, паведамляе карэспандэнт БЕЛТА.
Лідар сезона "Шахцёр" ужо на працягу шасці матчаў чаргуе перамогі з няўдачамі. Тры дні таму "гарнякі" дома не справіліся з "Хімікам" (3:4), затое ў панядзелак нанеслі значнае паражэнне аршанскаму "Лакаматыву" - 4:0. Дублем за салігарчан вызначыўся Павел Развадоўскі, тры ачкі (гол і дзве перадачы) набраў лідар бамбардзірскай гонкі чэмпіянату Міхаіл Стэфановіч.
У паралельным матчы хакеісты "Віцебска" сустракаліся са сталічным "Юнацтвам". Пасля двух перыядаў "мядзведзі" ўступалі мінчанам з лікам 1:2, але чатыры шайбы без адказу ў трэцяй 20-мінутцы схілілі шалі на карысць паўночных ігракоў - 5:2. Дзякуючы гэтаму поспеху "Віцебск" зраўнаваў лік з "Юнацтвам" у экстралізе, абедзве каманды з 60 ачкамі дзеляць трэці радок табліцы.
Акрамя таго, вечарам 23 студзеня серыю з шасці паражэнняў перапыніла "Дынама-Маладзечна", якое ў гасцях абыграла "Хімік" з лікам 3:2. Пераможным для "бела-блакітных" стаў дакладны кідок Дзмітрыя Пацалуйкі.
У аўторак у чэмпіянаце краіны па хакеі таксама адбудуцца тры матчы: "Гомель" прыме "Брэст", "Магілёў" дома сустрэнецца з "Лідай", цэнтральнай жа стане гульня ў Жлобіне паміж "Металургам" і "Нёманам". Усе паядынкі стартуюць у 19.00.-0-
