19 ліпеня, Мінск /Кар. БЕЛТА/. Футбалісты салігорскага "Шахцёра" атрымалі валявую вікторыю над бабруйскай "Белшынай" з лікам 2:1 у гасцявым матчы 15-га тура чэмпіянату Беларусі, паведамляе карэспандэнт БЕЛТА.
Усе мячы сустрэчы ў Бабруйску былі забіты ў другім тайме. На 66-й мінуце Іслам Часнакоў вывеў гаспадароў наперад, затым Максім Скавыш зраўнаваў рэзультат, а потым Ілья Чарняк забіў другі гол у вароты "Белшыны".
Раней лідары першынства футбалісты БАТЭ нечакана прайгралі на полі "Барысаў-Арэны" дэбютанту вышэйшай лігі дзяржынскаму "Арсеналу" з лікам 1:2. "Мінск" атрымаў вікторыю з вялікім лікам у гасцях у "Гомеля" - 3:0. Галявы дубль у гэтай сустрэчы аформіў Ягор Багамольскі. Госці перамаглі яшчэ ў двух паядынках: у Жодзіне "Іслач" перамагла футбалістаў "Тарпеда-БелАЗа" - 1:0, а "Славія" перамагла ў Магілёве мясцовы "Днепр" з рэзультатам 3:1. Футбалісты "Слуцка" перайгралі ў сябе дома брэсцкіх дынамаўцаў - 2:0. Сустрэча "Віцебск" - "Нёман" (Гродна) завяршылася ўнічыю - 2:2.
Матч сталічнага "Дынама" з "Энергетыкам-БДУ" перанесены на больш позні тэрмін.
Турнірнае становішча цяпер такое: БАТЭ - 29 ачкоў (15 матчаў), "Іслач" (Мінскі раён) - 28 (15), "Энергетык-БДУ" (Мінск) - 28 (14), "Мінск" - 26 (15), "Дынама" (Мінск) - 25 (13), "Шахцёр" (Салігорск) - 24 (13) "Славія" - 23 (14), "Гомель" - 22 (15), "Тарпеда-БелАЗ" (Жодзіна) - 20 (15), "Нёман" (Гродна) - 19 (14), "Слуцк" - 18 (14), "Белшына" (Бабруйск) - 17 (15), "Арсенал" (Дзяржынск) - 13 (15), "Віцебск" - 11 (15), "Дынама" (Брэст) - 7 (15), "Днепр" (Магілёў) - 6 (15).
Бамбардзірскую гонку ўзначальвае ўзбекскі форвард "Энергетыка-БДУ" Бабір Абдзіхолікаў, які забіў 14 мячоў.
Матчы 16-га тура пройдуць у пачатку жніўня.-0-
