2 верасня, Мінск /Кар. БЕЛТА/. Трыма матчамі прадоўжыўся чэмпіянат Беларусі па хакеі, што стартаваў напярэдадні. Першыя гульні ў новым сезоне правялі шэсць каманд экстралігі, паведамляе карэспандэнт БЕЛТА.
Упэўненую перамогу на старце чэмпіянату здабыў бронзавы прызёр мінулага першынства салігорскі "Шахцёр". На сваім лёдзе "гарнякі" разабраліся з гродзенскім "Нёманам" - 4:2, прычым да трэцяга перыяду гаспадары былі наперадзе на чатыры шайбы. Не пакінулі шанцаў саперніку і хакеісты аршанскага "Лакаматыва", якія на выездзе былі мацнейшыя за "Брэст" з лікам 5:1. Усе шайбы "чыгуначнікаў" прыпалі на другі перыяд, дубль аформіў Міхаіл Бучкін. Самы напружаны матч вечара выдалі "Дынама-Маладзечна" і "Хімік". Па ходзе сустрэчы дынамаўцы вялі два галы, але гасцям удалося змяніць ход гульні і ў выніку адсвяткаваць поспех - 3:2. Перамогу новапалачанам прынёс дакладны кідок Арцёма Зямлянкіна.
Наступныя матчы ў новым сезоне чэмпіянату Беларусі па хакеі пройдуць у нядзелю.-0-
