26 чэрвеня, Мінск /Кар. БЕЛТА/. Трохразовы алімпійскі чэмпіён у веславанні на каноэ Себасцьян Брэндэль з Германіі адзначыў высокі ўзровень правядзення II Еўрапейскіх гульняў, паведамляе карэспандэнт БЕЛТА.
Нямецкі спартсмен заняў сёння ў заездзе на 1000 м трэцяе месца, апярэдзіўшы беларуса Максіма Пятрова. "У першым фінале мэты абавязкова перамагчы не ставіў, неабходна правільна раскладваць сілы на ўвесь турнір. Канал у Заслаўі адзін з самых сучасных. Рады, што тут праходзяць такія маштабныя спаборніцтвы. Для весляроў Старога Свету II Еўрапейскія гульні - важны старт, у Мінск прыехалі ўсе мацнейшыя. Шмат у якіх месцах выступаў за кар'еру, але Мінск пастараўся арганізаваць усё на высокім узроўні: харчаванне, праезд, элінгі, месца старту - увесь сэрвіс на ўзроўні чэмпіянатаў свету і алімпіяд", - расказаў знакаміты вясляр-канаіст.
У першы дзень на вяслярным канале ў Заслаўі беларускія спартсмены заваявалі дзве ўзнагароды: бронза ў заездзе на 1000 м на каноэ ў Алега Юрэні і золата ў заездзе на 500 м на байдарцы-двойцы ў Марыны Літвінчук у пары з Вольгай Худзенка.
Беларуская зборная на II Еўрапейскіх гульнях ужо заваявала 43 узнагароды, столькі ж, колькі чатыры гады таму ў Баку за ўвесь турнір. Аднак у Мінску спаборніцтвы прадаўжаюцца, і балельшчыкі могуць разлічваць на новыя перамогі беларускіх спартсменаў.-0-
