12 снежня, Мінск /Кар. БЕЛТА/. Пятая ракетка планеты Арына Сабаленка прызнана лепшай тэнісісткай Беларусі ў 2022 годзе, паведамляе карэспандэнт БЕЛТА.
У адыходзячым годзе Арына Сабаленка паказвала гульню найвышэйшага ўзроўню, паднімаючыся па ходзе сезона на другую пазіцыю ў сусветным рэйтынгу. На падагульняючым турніры Жаночай тэніснай асацыяцыі (WTA) яна абыграла першую ракетку свету Ігу Свёнтак і ўпершыню ў кар'еры дабралася да фінальнага паядынку. Акрамя таго, Арына Сабаленка другі раз запар дабралася да паўфіналу аднаго з турніраў серыі "Вялікага шлема" - адкрытага чэмпіянату ЗША. Цяпер 24-гадовая мінчанка рыхтуецца да адказных стартаў новага сезона, першым з якіх у пачатку студзеня стане адкрыты чэмпіянат Аўстраліі.
У мужчын лепшым тэнісістам Беларусі стаў Ілья Івашка. У бягучым годзе ён нядрэнна праявіў сябе на прэстыжных турнірах, на роўных змагаючыся з лідарамі сусветнага тура. У чэрвені гэтага года дасягнуў свайго лепшага паказчыка ў рэйтынгу Асацыяцыі тэнісістаў-прафесіяналаў (АТР), падняўшыся на 40-е месца.
Лепшымі ігракамі ў парным разрадзе прызнаны Аляксандр Згіроўскі і Аляксандр Леаненка. У намінацыі "Характар года" спецыяльнага прыза ўдастоены Вадзім Стрэльскі, які стаў чэмпіёнам Беларусі па тэнісе на калясках. Лепшымі юніёрамі названы Юлія Перапехіна і Станіслаў Бульбянкоў. Сярод трэнераў лепшай прызнана Настасся Шляпцова.
Уручаючы ўзнагароды лаўрэатам, старшыня Беларускай тэніснай федэрацыі Сяргей Рутэнка адзначыў, што для яго гэта быў першы паўнацэнны год у якасці кіраўніка БТФ: "Год выдаўся вельмі няпросты. Я ўдзячны нашым тэнісістам, якія ў цяперашніх цяжкіх рэаліях - праблемы з візамі, адхіленне ад некаторых турніраў, посткавідныя і іншыя абмежаванні - змаглі выступіць вельмі дастойна. Як гаворыцца, цяжкія часы ствараюць моцных людзей".-0-
