22 красавіка, Мінск /Кар. БЕЛТА/. Адхіленне беларускіх і расійскіх тэнісістаў ад удзелу ў Уімблдонскім турніры з'яўляецца абсалютна неправамоцным. Аб гэтым заявіў сёння старшыня Беларускай тэніснай федэрацыі Сяргей Рутэнка, перадае карэспандэнт БЕЛТА.
Рутэнка падкрэсліў, што БТФ катэгарычна асуджае прынятае арганізатарамі Уімблдона рашэнне і ўсімі сіламі будзе дапамагаць беларускім тэнісістам. "Я сам спартсмен і вельмі добра разумею, у якой складанай сітуацыі цяпер апынуліся нашы тэнісісты. Мы не збіраемся кідаць іх, сустракаемся, спрабуем падтрымліваць, але не ўсё ў нашых сілах", - адзначыў кіраўнік БТФ.
Ён таксама расказаў, што цяпер вядуцца кансультацыі з юрыстамі ў плане далейшых дзеянняў. "Акрамя таго, літаральна сёння размаўлялі з прэзідэнтам Федэрацыі тэніса Расіі Шамілем Тарпішчавым на прадмет магчымых сумесных крокаў па выпраўленні бягучай сітуацыі", - сказаў Сяргей Рутэнка.
Нягледзячы на ўсе падзеі, беларускія тэнісісты адчуваюць падтрымку калег са многіх краін свету, паколькі пераважная большасць спартсменаў салідарныя з імі, лічыць Сяргей Рутэнка. Ён таксама нагадаў, што і АТР, і WTA адназначна заявілі, што арганізатары Уімблдона парушылі ўстаноўленыя правілы - на турнір тэнісісты адбіраюцца выключна ў адпаведнасці з рэйтынгамі. Любая дыскрымінацыя, у тым ліку па нацыянальным прынцыпе, недапушчальна.-0-
