9 сакавіка, Мінск /Кар. БЕЛТА/. Расійскі біятланіст Эдуард Латыпаў стаў пераможцам спрынтарскай гонкі заключнага этапу Кубка Садружнасці, які праходзіць у цэнтры зімовых відаў спорту "Жамчужына Сібіры" ў Цюмені, паведамляе карэспандэнт БЕЛТА.
Сёння Латыпаў пераадолеў дыстанцыю працягласцю 10 км за 24 мін. 47,1 сек., не дапусціўшы ніводнага промаху на двух агнявых рубяжах. Другое месца ў Данілы Серахвостава (+30,0 сек.; 1 промах), трэцім фінішаваў яшчэ адзін расіянін Васіль Томшын (+56,9 сек.; 1). Лепшым з беларусаў сёння аказаўся Мікіта Лабастаў, які заняў 10-е месца. На жаль, лідар беларускай зборнай Антон Смольскі з-за хваробы не змог выйсці на старт, гэтак жа, як і Дзмітрый Лазоўскі. Маючы 1481 ачко, Антон Смольскі ўступіў лідарства ў генеральнай класіфікацыі Кубка Садружнасці Эдуарду Латыпаву, у якога стала 1577 ачкоў, трэцім ідзе расіянін Карым Халілі (1378 балаў).
У першай сённяшняй гонцы - жаночым спрынце на 7,5 км увесь п'едэстал гонару таксама занялі расійскія біятланісткі: Кацярына Наскова, Вікторыя Сліўко і Настасся Шаўчэнка. Ідучая першай у агульным заліку беларуска Дзінара Алімбекава-Смольская заняла 4-е месца. Перад дзвюма астатнімі гонкамі ў актыве Алімбекавай-Смольскай 1551 ачко, на другой пазіцыі Вікторыя Сліўко - 1492 балы, трэцяй ідзе яшчэ адна расіянка Ірына Казакевіч, у якой 1474 ачкі.
Апошні этап Кубка Садружнасці па біятлоне прадоўжыцца ў суботу дзвюма гонкамі праследавання. Пераможцы агульных залікаў міжнароднага старту вызначацца 12 сакавіка, у гэты дзень пройдуць гонкі з масавым стартам.-0-
